|
|
|
هۆشیار عومه‌ر: په‌رله‌مان بڕیار له‌سه‌ر ئه‌نجامدان یان دواخستنی هه‌ڵبژاردن ده‌دات |
|
9/5/2018 3:08:44 PM |
هۆشیار عومه‌ر عه‌لی ئه‌ندامی جڤاتی نیشتمانی بزوتنه‌وه‌ی گۆڕان رایگه‌یاند، له كۆبونه‌وه‌ی وه‌فدی گۆڕان و پارتیدا سێ ته‌وه‌ر گفتوگۆیان له‌باره‌وه كراوه كه ئه‌وانیش بریتی بون له په‌یوه‌ندیی نێوان گۆڕان و پارتی و ره‌وشی عێراق و حكومه‌تی ئاینده و هه‌روه‌ها شێوازی ئیشكردنی كورد له به‌غدا و هه‌ڵبژاردنی په‌رله‌مانی كوردستان.
له‌میانی به‌شداریكردنی له به‌رنامه‌ی (دیداری ئه‌مڕۆ) له كه‌ناڵی (KNN)، هۆشیار عومه‌ر عه‌لی رونیكرده‌وه، گۆڕان پێی وایه چه‌ند گرفتێكی سه‌ره‌كی هه‌ن كه رێگرن له ئه‌نجامدانی هه‌ڵبژاردنێكی پاك و بێگه‌رد له هه‌رێم وه‌ك پاكنه‌كردنه‌وه‌ی تۆماری ده‌نگده‌ران له‌لایه‌ن كۆمسیۆنه‌وه كه حیزبه‌كانی تریش به به‌ڵگه‌وه تانه‌یان له‌و تۆماره داوه، هه‌روه‌ها كوردستان له ره‌وشێكی ناسه‌قامگیردایه به‌تایبه‌ت دوای ئه‌وه‌ی ته‌زویرێكی زۆر كرا له هه‌ڵبژاردنی رابردودا و وڵاتانی ده‌وروبه‌ر و حیزبه‌كانی تریش ده‌زانن كه قه‌باره‌ی گۆڕان ئه‌وه نیه كه له هه‌ڵبژاردنی رابردو به‌ده‌ستی هێنا.
وتیشی: له كۆبونه‌وه‌مان له‌گه‌ڵ وه‌فدی پارتی ئه‌م په‌یامانه‌مان گه‌یاندوه و باسمان له‌وه كردوه كه خه‌ڵك هیوای به پرسه‌ی سیاسی كه‌مبوه‌ته‌وه و پێویستمان به‌وه هه‌یه دۆخی ئابوری باش بكه‌ین و موچه وه‌ك خۆی لێ بكرێته‌وه.
سه‌باره‌ت به دواخستن یان دوانه‌خستنی هه‌ڵبژاردنی په‌رله‌مانی كوردستانه‌وه، هۆشیار عومه‌ر وتی: له‌ڕوی یاساییه‌وه په‌رله‌مان بڕیار له‌سه‌ر ئه‌وه ده‌دات كه پرۆسه‌كه بكرێت یان دواخرێت.
له‌باره‌ی چۆنێتی به‌شداریكردنی كورد له به‌غدا، له ساڵی (2010)وه كه بۆ یه‌كه‌مجار گۆڕان به‌شداری له هه‌ڵبژاردنی په‌رله‌مانی عێراق كردوه بڕوامان وابوه كه به‌رژه‌وه‌ندی كورد له یه‌ك گوتاریدایه، كورد پێویسته وردبینانه بیر بكاته‌وه و په‌له نه‌كات به‌تایبه‌تی له‌ئێستادا كه هیچ ده‌ره‌نجامێك رون نیه و دیار نیه كه‌ی حكومه‌تی داهاتوی عێراق پێكده‌هێنرێت.
وتیشی: گۆڕان هه‌رگیز سیاسه‌تی یه‌كتر سڕینه‌وه‌ی نه‌بوه، به‌ڵكو چه‌ند لایه‌نێكی دیكه ئه‌و سیاسه‌ته‌یان هه‌بوه به‌رامبه‌ر به گۆڕان، پێمان وایه ژیانێكی سه‌قامگیر ده‌كرێ ببێته زه‌مینه‌یه‌ك بۆ گۆڕان و چاكسازی. |
|
|
|