شۆرش حاجی ئەندامی خانەی راپەڕاندنی گۆڕان، رایگەیاند: لە ئێستادا کەشوهەوای کۆمەڵایەتی و سیاسی لەبارنییە و تۆمارێکی دەنگدەرانی پاک نییە بۆ ئەوەی هەڵبژاردنی پەرلەمانی کوردستان بەڕێوەدەچێت.
دوابەدوای کۆبونەوەی هاوبەشی وەفدی بزوتنەوەی گۆڕان و پارتی دیموکراتی کوردستان، هەریەک لە شۆڕش حاجی و مەحمود محەمەد، وەڵامی پرسیاری رۆژنامەنوسانیان دایەوە.
لەسەرەتای کۆنگرە رۆژنامەوانییەکەدا، شۆڕش حاجی ئەندامی خانەی راپەڕاندنی بزوتنەوەی گۆڕان تەوەرەکانی کۆبونەوەکەی ئاشکرا کرد، کە لەسەر پرسی پەیوەندییەکانی گۆڕان و پارتی و بەشداریی کورد لە پرۆسەی سیاسی عێراق و هەڵبژاردنی پەرلەمانی کوردستان گفتوگۆیان ئەنجامداوە.
سەبارەت بە پەیوەندییەکانی نێوان گۆڕان و پارتی، رایگەیاند: بزوتنەوەی گۆڕان و پارتی دیموکراتی کوردستان، دو هێزی سەرەکین لە هەرێمی کوردستان، دەبێت لەسەر بەرژەوەندییە نیشتیمانی و نەتەوەییەکان هاوڕابن و کاری هاوبەش لەنێوانیاندا هەبێت، بۆ ئەوەی ئەگەر لەسەر پرسەکان هەڵوێستی جیاوازیان هەبێت ئاگاداری بۆچون و دید و هەڵوێستی یەکتربین.
سەبارەت بە بەشداریی کورد لە بەغدا، شۆڕش حاجی رایگەیاند: پێویستە لە بەغدا کورد داکۆکی لە مافەکانی کورد بکات لەسەر بنەمای شەراکەت و هاوبەشیی راستەقینە و داکۆکی کردن لە داواکاریی و مافە دەستوریی و یاساییەکانی خەڵکی کوردستان.
لەبارەی هەڵبژاردنی پەرلەمانی کوردستانیشەوە، ئەندامەکەی خانەی راپەڕاندن رایگەیاند: بۆچونی ئێمە وایە کە چەند هۆکارێک هەن کە وایکردوە کەشوهەوای هەڵبژاردنی تەندروست لەبار نەبێت بۆ هەڵبژاردنی پەرلەمانی کوردستان، بەهۆی ئەوەی خەڵک نیگەرانە و گوزەرانی خراپە، هەروەک ئاستی بەشداریکردنی خەڵک لە هەڵبژاردنی (12)ی ئایار رێژەیەکی زۆر کەم بو، دورنییە لە هەڵبژاردنی پەرلەمانی کوردستانیشدا ئەگەر لەکاتی خۆیدا ئەنجام بدرێت، بەشداریی خەڵک و دەنگدەر زۆر کەمتر دەبێت.
وتیشی :"ئێمە لە بزوتنەوەی گۆڕان بەپێی ئەو زانیارییانەی هەمانە، تۆماری دەنگدەران پاکنەکراوەتەوە بۆ ئەوەی لەسەر بنەمای ئەو تۆمارە هەڵبژاردنێکی پاک ئەنجامبدرێت".
شۆرش حاجی جەختی کردەوە کە؛ پێویستە هەڵبژاردن ببێتە مایە تەبایی و برایەتی و سەقامگیریی و ئاشتەوایی و یەکڕیزی، نەک ئاشتی و ئارامی بخاتە مەترسییەوە.
ئاماژەی بەوەشکرد؛ داوایان لە حکومەتی هەرێمی کوردستان کردوە کار بکات بۆ سوککردنی باری سەر شانی خەڵک و باشکردنی گوزەرانی خەڵک و دابینکردنی خزمەتگوزاریی و پێویستییەکانیان.
هەر لەو کۆنگرە رۆژنامەوانییەدا، مەحمود محەمەد وتەبێژی مەکتەبی سیاسی پارتی دیموکراتی کوردستان رایگەیاند: ئەوەی لامان گرنگە ئەوەیە پەیوەندییەکانی پارتی و گۆڕان گرنگییەکی زۆری هەیە و لەسەر کۆی پرۆسەی سیاسی هەرێمی کوردستان کاریگەریی گەورەی هەیە، چونکە چەند دوریی هەبێت لە پەیوەندییەکان کاریگەریی خراپی دەبێت، هەروەک ئاگا لەیەک نەبون و دورکەوتنەوە کاریگەری خراپی دەبێت لەسەر کۆی پرۆسەی سیاسی هەرێمی کوردستان.
جەختیشیکردەوە، کە بزوتنەوەی گۆڕان و پارتی دیموکراتی کوردستان لەسەر خاڵی گەورە و بەرژەوەندی نەتەوەیی کێشەی ئەوتۆیان نییە، بەڵکو لەسەر چۆنیەتی سیاسیەت کردن بۆچونی جیاوازیان هەیە.
وتیشی :" پێویستە یەکتربینین و گفتوگۆ هەبێت، بۆ ئەو مەبەستەش رەنگە لیژنەی هاوبەش دروست بکرێت بۆ گفتوگۆ کردن و زانینی بیروڕای یەکتری".
لەبارەی هەڵبژاردنی پەرلەمانی کوردستانەوە، وتەبێژی پارتی رایگەیاند: درێژکردنەوەی تەمەنی پەرلەمان لە ساڵی رابردودا کارێکی باش نەبوە، دەبو بەهاری رابردو هەڵبژاردن بکرایە، ئێستاش کە (30)ی ئەیلول دیاریکراوە بە پرس و رای لایەنەکان بوە و پێمانوایە کەشوهەوا لەبارە بۆ هەڵبژاردن و گرفتی تەکنیکی ئەوتۆ لای کۆمیسیۆن نییە و کێشەیەکی سیاسی و کۆمەڵایەتی ئەوتۆ نییە رێگر بێت لەبەردەم ئەنجامدانی هەڵبژاردن، لەگەڵ ئەوەشدا پێویستە حکومەت و پەرلەمانی تازە پێکبهێنرێت بۆ ئەوەی پاڵپشتی زیاتری لە روی سیاسی و کۆمەڵایەتییەوە هەبێت.
مەحمود محەمەد ئەوەی خستەڕو، لەگەڵ ئەوەشدا لە بۆچون و هەڵوێستی لایەنەکانی دیکە و بزوتنەوەی گۆڕان تێدەگەین و بۆ ئەو مەبەستەش پەیوەندی بەردەوام دەبێت و کۆبونوەکان بۆ چارەسەری کیشەکان بەردەوام بێت و لە داهاتودا یەکتر دەبینن.
سەبارەت بە بەشداریکردن یان بایکۆتی هەڵبژاردنی پەرلەمانی کوردستان لەلایەن بزوتنەوەی گۆڕانەوە، شۆڕش حاجی رایگەیاند: پرەنسیپی ئێمە ئەوەیە هەڵبژاردن لەکاتی خۆیدا بکرێت، ساڵی رابردوش نیگەران بوین لە دواخستنی هەڵبژاردنەکان، بەڵام ئێمە پێمانوایە ئەم بارودۆخەی ئێستا هەیە لە نیگەرانی خەڵک و باری دارایی و نیگەرانی خەڵک لە لایەنە سیاسییەکان و بەتایبەتیش لایەنەکانی دەسەڵات و ساختەکارییەکانی هەڵبژاردنی پێشو، ناخاوێنی تۆماریی دەنگدەران، بۆیە بارودۆخی کوردستان بۆ ئەنجامدانی هەڵبژاردن گونجاو نییە و کاریگەریی خراپی دەبێت لەسەر سەقامگیریی و ئاشتی کۆمەڵایەتی.
وتیشی :"بڕیاری بزوتنەوەی گۆڕان، بڕیاری جڤاتی نیشتمانییە کە بەمنزیکانە کۆدەبێتەوە و دوای هەڵسەنگاندنی دۆخەکە و بیروڕاکان، جڤاتی نیشتیمانی بڕیاری بەشداریی یان بایکۆتی هەڵبژاردن دەدات یان هەڵوێستێکی دیکەی دەبێت".
. |