نوێنەری نەتەوەیەکگرتوەکان لە عێراق سەردانی بزوتنەوەی گۆڕانی کرد و پرسی هەڵبژاردنەکان و دۆخی هەرێمی کوردستانی لەگەڵ گۆڕان تاوتوێ کرد.

ئەمڕۆ دوشەممە یان کۆبیچ نوێنەری تایبەتی سکرتێری نەتەوەیەکگرتوەکان، لە کۆبونەوەی لەگەڵ عومەر سەید عەلی رێكخەری گشتی و محەمەد تۆفیق رەحیم ئەندامی خانەی راپەڕاندنی بزوتنەوەی گۆڕان و هۆشیار عومەر عەلى رێکخەرى ژورى پەیوەندییە دیپلۆماسییەکان، رایگەیاند؛ چاودێریی پڕۆسەی هەڵبژاردنەکانی هەرێمی کوردستان دەکەن لە رێگەی چاودێرانی نەتەوەیەکگرتوەکانەوە.

لە کۆبونەوەکە چۆنیەتی بەشداریی کورد لە حکومەتی داهاتوی عێراقدا گفتوگۆی لەسەر کراوە و نوێنەری نەتەوەیەکگرتوەکان جەختی لەوە کردوەتەوە کە دەبێت سەرجەم پێکهاتەکان لە حکومەتی نوێی عێراق بەشداربن.

یان کۆبیچ ئاماژەی بەوەکرد؛ بزوتنەوەی گۆڕان راستگۆیە و دڵخوش بوە کە چەند جارێک لەگەڵ ئەو حیزبەدا گفتوگۆ و کۆبونەوەی کردوە.