كونسوڵی نوێی ئەمریكا لە هەرێم سەردانی ڕێكخەری گشتی گۆڕانی كرد لەشاری سلێمانی و گفتوگۆیان لەبارەی ساختەكاری هەڵبژارنەكەی پەرلەمانی عێراق و ئامادەكاری بۆ هەڵبژاردنەكەی پەرلەمانی كوردستان كرد.

ستیڤن فەیگن، كە ماوەی دوو هەفتەیە وەك كونسوڵی نوێی ئەمریكا لەهەرێمی كوردستان دەستبەكار بووە، لەگەڵ وەفدێكی یاوەری سەردانی مەكۆی سەرەكی گۆڕانی كرد لەسلێمانی و لەگەڵ عومەری سەید عەلی ڕێكخەری گشتی گۆڕان و ژمارەیەك لە ئەندامانی ژوورەكانی سیاسی و دیبلۆماسی كۆبووەوە.

لە كۆبوونەوەكەدا، وێڕای پیرۆزبایی لە پۆستە نوێیەكەی فەیگن، ڕێكخەری گشتی جەختی لەوە كردەوە كە وەك گۆڕان ئەنجامەكانی هەڵبژاردنی پەرلەمانی عێراق ڕەتدەكەنەوەو بۆ ئەو مەبەستەش ڕێوشوێنی تایبەتیان لەوبارەیەوە گرتووەتەبەر.

ئامادەكارییەكان بۆ هەڵبژاردنی پەرلەمانی كوردستان و نەبوونی خزمەتگوزارییەكان و تووڕەیی هاوڵاتیان، تەوەرێكی تری كۆبوونەوەكەی هەردوولایان بوو.