کۆبونەوەی سەرکردەی چوار لایەنە سیاسییەکەی هەرێم کۆتایی هات و ئەنجامی هەڵبژاردنەکانیان رەتکردەوە و بڕیاریاندا رێکاری یاسایی لەو بارەیەوە بگرنەبەر.

کۆبونەوەی سەرکردەی چوار لایەنەکە (گۆڕان، کۆمەڵ، یەکگرتو، هاوپەیمانی) کە لە مەکۆی سەرەکی بزوتنەوەی گۆڕان بەرێوەچو، کۆتایی هات و لە راگەیەندراوێکی هاوبەشدا جەختیان کردەوە کە ئەژمارکردنەوەی دەستی دەنگەکان تەنها بۆ پەردەپۆشکردن و تێپەڕاندنی ئەو ساختەکارییە گەورەیە بو کە ئەنجام درا.

هەروەک جارێکی تر ئەنجامەکانیان رەتکردەوە و پێداگرییان لەسەر هەڵوێستەکانی پێشویان کردەوە و رایانگەیاند؛ رێکاری یاسایی و سیاسی پێویست دەگرنەبەر بە پێناو گێڕانەوەی متمانە بۆ پرۆسەی سیاسی و پاراستنی دەنگی دەنگدەران.

هەر چوار لایەنەکە داوا دەکەن کاری جدیی بکرێت لە پێناو ئەنجامدانی هەڵبژاردنێکی پاک و بێگەرد لە هەرێمی کوردستاندا و کە دڵنیایی بداتە هاوڵاتیان و لایەنە سیاسیەکان ئەمەش بە پاککردنەوەی تۆماری دەنگدەران و چاکسازیی لە رێکار و یاساکانی کۆمیسیۆن کە کات و زەمینەی هەڵبژاردنێکی بێ ساختەکاری فەراهەم بکات و ببێتە مایەی پتەوکردنی ئاستەوایی کۆمەڵایەتی.


راگەیەندراوی هاوبەش

 دوای راگەیاندنی دەرەنجامەکانی کۆمیسیۆن لە هەژمارکردنەوەی بەشێکی زۆر کەم لە سندوقەکانی دەنگدان لە پارێزگاکانی عێراق و هەرێمی کوردستان بە لاڕێدابردنی هەمواری یاسای هەڵبژاردنەکان لە ئەنجومەنی نوێنەران بۆ هەژمارکردنەوەی گشتی سندوقەکانی دەنگدان.

ئەوەی رون و ئاشکرا بو ئەم هەژمارکردنە بۆ پەردەپۆشکردن و تێپەڕاندنی ئەو ساختەکارییە گەورەیە بو کە ئەنجام درا، لێرەوە جارێکی تر رایدەگەیەنین کە ئەم دەرەنجامانە رەتدەکەینەوە و پێداگریی لەسەر هەڵوێستەکانی پێشومان دەکەینەوە و رێکاری یاسایی و سیاسی پێویست دەگرینەبەر بە پێناو گێڕانەوەی متمانە بۆ پرۆسەی سیاسی و پاراستنی دەنگی دەنگدەرانمان.

سەرەڕای ئەم ستەمە سیاسیە گەورەیە بەرامبەر بە بەشێک لە لایەنە سیاسییەکان و هاوڵاتیان لە سۆنگەی هەستکردنمان بە بەرپرسیارێتی ئێستا و ئایندەی گەلەکەمان و هەستیاری بارودۆخەکە جەخت دەکەینەوە لەسەر پێویستی دایەلۆگێکی نیشتیمانی بەرپرسیارانە لە کوردستان بۆ دۆزینەوەی چارەسەری ریشەیی و بنەڕەتی بۆ قەیران و گرفتەکانی ئەم دۆخە سیاسیە و دەربازکردنی کوردستان لەم بارودۆخە نالەبار و چەقبەستوە و پتەوکردنی یەکڕیزی نیشتیمانی لەسەر بنەمای سازان و هاوسەنگی سیاسی و شەراکەتی راستەقینە و رەچاوکردنی ئەگەرەکانی بەردەم دۆخی سیاسی عێراق و ناوچەکە و رێگریی لە پشێوی و ناتەبایی و ئاڵۆزی زیاتر.

لە هەمانکاتدا داوا دەکەین کاری جدیی بکرێت لە پێناو ئەنجامدانی هەڵبژاردنێکی پاک و بێگەرد لە هەرێمی کوردستاندا و کە دڵنیایی بداتە هاوڵاتیان و لایەنە سیاسیەکان ئەمەش بە پاککردنەوەی تۆماری دەنگدەران و چاکسازیی لە رێکار و یاساکانی کۆمیسیۆن کە کات و زەمینەی هەڵبژاردنێکی بێ ساختەکاری فەراهەم بکات وە ببێتە مایەی پتەوکردنی ئاستەوایی کۆمەڵایەتی.

هەروەها ئەم چوار لایەنە هاوڕابون لەسەر یەک هەڵویستیان لە بەغدا و هەنگاوی هاوبەشی زیاتر لە پێناو پاراستنی مافە دەستوی و نەتەوەییەکان.

        یەکگرتوی ئیسلامی کوردستان                               بزوتنەوەی گۆڕان
هاوپەیمانی بۆ دیموکراسی و دادپەروەری                   کۆمەڵی ئیسلامی کوردستان

      2018/8/11