سەرۆكی پێشووی فراكسیۆنی گۆڕان لە ئەنجومەنی نوێنەران رایدەگەیەنێت كۆمسیۆنی هەڵبژاردنەكان كە لەلایەن ژمارەیەك دادوەرەوە سەرپەرشتی دەكرێت لەبەرخاتری لایەنە تەزویرچیەكان پشتی لەجێبەجێكردنی یاساكەی پەرلەمان كرد.

ئەمین بەكر سەرۆكی پێشوی فراكسیۆنی گۆڕان راشیگەیاند، لەمادەی یەكەمی یاساكەی پەرلەماندا هاتوە دەبێت كۆی سندوقەكانی دەنگدان لە هەمو عێراق بەدەست ئەژمار بكرێنەوە و لە بڕگەی دوەمدا دەڵێت ئەنجامی ئەژماری ئەلیكترۆنی هەڵدەوەشێتەوە، بەڵام كۆمسیۆن بێ هیچ پاڵپشتێكی یاسایی رایگەیاند كە تەنها ئەو سندوقانە ئەژمار دەكەنەوە كە تانەیان لێدراوە.

ئاماژەی بەوەشكرد كۆمسیۆن بڕیاریدا لە سلێمانی تەنها دەنگی (188) سندوق ئەژمار بكاتەوە لەو ژمارەیەش (57) سندوق قفڵەكانیان شكێندرا بۆ ئەوەی بسوتێندرێن و (13) سندوقیش هەر لەسەرەتاوە برانە بەغدا. لە ئەنجامی (91) سندوقیش كە راگەیەندران (2) هەزار و (991) دەنگ بۆ یەكێتی تەزویر كراوە لەسەر حسابی بزوتنەوەی گۆڕان و لایەنەكانی تر (27) سندوقیش تائێستا ئەنجامەكەیان رانەگەیەندراوە، دەشڵێت ئەگەر دەنگی ئەو (91) سندوقە وەك نمونە وەربگرین ئەوە لە سلێمانیدا (145) هەزار دەنگ لە بەرژوەندی یەكێتی تەزویر كراوە.