یوسف محەمەد: یاساکەی ئەمڕۆ هەنگاوێکی گرنگە بۆ وەستاندنی هەڵەیەکی رابردو
د.یوسف محەمەد، رایدەگەیەنێت: یاسای هەڵپەساردنی دامەزراوەی سەرۆکایەتی هەرێم، هەنگاوێکی گرنگە بۆ وەستاندنی هەڵەیەکی دیکەی رابردو و، رێککەوتن لەسەر سیستمی پەرلەمانیی تەواو لە خولی داهاتوی پەرلەمان.
سەرۆکی پێشوی پەرلەمان ئەو دەنگۆو ئیدیعایانە رەتدەکاتەوە کە لە خولی داهاتوی پەرلەمان، مەسعود بارزانی سەرۆکی پێشوی هەرێم بۆی دەبێت جارێکی تر خۆی بۆ ئەو پۆستە کاندید بکاتەوە.
لە نوسینێکیدا بەناونیشانی (یاسای هەڵپەساردنی دامەزراوەی سەرۆکایەتیی هەرێم) کە لەبەشی بیروڕای سایتی سبەی بڵاوبوەتەوە، د.یوسف محەمەد سادق سەرۆکی پێشوی پەرلەمانی کوردستان ئاماژەی بەوەکردوە؛ هەر لە سەرەتای تێپەڕاندنی یاسای سەرۆکایەتیی هەرێم، ئەم دامەزراوەیە وەک سەفقەیەک بەرامبەر بە سەرۆکایەتیی کۆماری عێراق دروستکرا، نەک پێویستیی هەرێمی کوردستان و سیستمی حوکمڕانییەکەی بە بونی دامەزراوەیەکی لەم شێوەیە، هەر ئەو کاتیش "کاک نەوشیروان" زنجیرەیەک وتاری سەبارەت بەم پرسە نوسی و، ڕەخنەی جدیی لە یاساکە گرت.
د.یوسف محەمەد، جەخت دەکاتەوە کە لەگەڵ سیستمی پەرلەمانین هاوشێوەی بەغدا بەو مانایەی سەرۆک لە ناو پەرلەمانەوە هەڵبژێردرێت، نەک لەناو خەڵک و دەسەڵاتەکانی شکڵی بن و لە ژێر چاودێریی پەرلەمان بێت.
ئاماژەی بەوەکردوە؛ نە لە رابردو و نە لە ئێستاش لە پێناو بەستنی سەفقە بۆ وەرگرتنی هەر پۆستێک چ لە بەغدا و چ لە هەرێم نەمانویستوە و نامانەوێت کارکردن بەم یاسایە دریژە بکێشێت.
سەرۆکی دەستلەکارکێشاوەی پەرلەمان نوسیویەتی: ئەوکاتەی دژی درێژکردنەوەی ماوەی سەرۆکایەتیی هەرێم بوین و داوای هەمواری یاسای سەرۆکایەتیمان کرد، پەیوەندیی بە کێشەی شەخسی و دژایەتی کردنی هیچ کەسەیاتییەکەوە نەبو، بەڵکو لە روانگەی بڕوا بونمانەوە بو بۆ گۆڕینی سیستمی حوکمڕانیی هەرێم، هەر بۆیەش لە ئێستا و داهاتوشدا لەگەڵ ئه‌نجامدانی هەڵبژاردنی سه‌رۆكایه‌تیی هه‌رێم نین، بەپێی ئەم یاسایەی ئێستای سەرۆکایەتیی هەرێم، تەنانەت ئەگەر کاندید بۆ ئەو پۆستە گۆڕانیش بێت.
د. یوسف محەمەد ئەوەی خستوەتەڕو کە؛ هەرکات بویسترێت پێش پەسەندکردنی دەستوری هەرێم، هەڵبژاردنی سەرۆکایەتیی هەرێم ئەنجام بدرێت، ئەوا هەر بەپێی ئەم یاسایەی ئێستای سەرۆکایەتیی دەکرێت کە مافی خۆ کاندیدکردنی تەنها بە دو خول دیاریکردوە، نەک هەر ئەوە، بەڵکو لەو پڕۆژەیەی ساڵی (2013) وەک لایەنەکانی ئۆپۆزسیۆن بۆ هەمواری پڕۆژەی دەستوری هەرێمی کوردستان، ئامادەمانکردوە، مادەی (63)ی پڕۆژەکەمان ئاوا داڕشتۆتەوە کە؛ ماوەی ویلایەتی سەرۆکی هەرێمی کوردستان چوار ساڵە، کە لە رۆژی سوێندخواردنیەوە دەست پێدەکات و دەکرێت تەنها بۆ ویلایەتی دوەمیش هەڵبژێردرێتەوە بەپێی ئەم دەستورە و یاسا کارپێکراوە پەیوەندیدارەکان، واتە هەر کەسێک تەنها دو جار مافی خۆ کاندید کردنی هەیە بەپێی یاسای سەرۆکایەتی بێت یان دەستور.
سەرۆکی پێشوی پەرلەمان ئەو دەنگۆو ئیدیعایانە رەتدەکاتەوە کە لە خولی داهاتوی پەرلەمان، مەسعود بارزانی سەرۆکی پێشوی هەرێم بۆی دەبێت جارێکی تر خۆی بۆ ئەو پۆستە کاندید بکاتەوە.
د.یوسف محەمەد سادق، دوپاتی کردوەتەوە کە سورن لەسەر پرەنسیپە جێگیرەکانیان و لە خولی ئایندەی پەرلەمانی کوردستانیش هەر کار بۆ هێنانەکایەی سیستمێکی حوکمڕانیی خەڵک سالار دەکەن و ئەو یاسایەی ئەمڕۆ لە پەرلەمان پەسەندکرا هەنگاوێکی گرنگە بۆ وەستاندنی هەڵەیەکی دیکەی رابردو، رێککەوتن لەسەر سیستمی پەرلەمانیی تەواو لە خولی داهاتوی پەرلەمانی کوردستان.