عەبدولستار مەجید ئاماژە بەوە دەکات؛ چوار لایەنەکە بۆ بەشداریكردن لە گفتوگۆكان چاوەڕێی یەكلابونەوەی سكاڵاكانیان دەكەن لەسەر ئەنجامی هەڵبژاردن و رایدەگەیەنێت؛ هەر بانگهێشتنامەیەكیان ئاراستە بكرێت پێكەوە بڕیاردەدەن و تا سکاڵاکانیش یەکلا نەبێتەوە گفتوگۆ ناکەن.

هەرچەندە بانگهێشتنامەى حەیدەر عەبادی سەرۆك وەزیرانی عێراق بۆلایەنە سیاسیەكان تائێستا نەبوەتە فەرمى و بەهیچ لایەنێکى سیاسى عێراق ‌و هەرێم نەگەیشتوە، بەڵام لەناو هێزو لایەنە سیاسیەكاندا لەسەر بەشداریكردنی ئەو كۆبونەوەیە بۆچونی جیاواز هەیە.

لاى خۆیانەوە بزوتنەوەی گۆڕان ‌و كۆمەڵی ئیسلامی كوردستان ‌و یەكگرتوی ئیسلامی كوردستان و هاوپەیمانیەتى بۆ دادپەروەرى و دیموکراسى یەك بۆچونیان هەیە و جەختخ لەوە دەکەنەوە؛ هەروەك لە كۆبونەوەی لوتكەی نێوانیان بڕیاریانداوە بەتەنها هیچ هەنگاوێك نانێین و ئەوە دەخەنەڕو؛ تا یەکلابونەوەى رێكارە یاساییەكان و ئەنجامى ئەو سکاڵایانەى لەسەر ئەنجامى هەڵبژاردنەکەى (12)ى ئایار پێشکەشیان کردوە و ئەنجامی راستەقینەکان ئاشكرا دەكرێت گفتوگۆ و كۆبونەوە لەم قۆناغەدا بە باش نازان و رەتیدەكەنەوە.

عەبدولستار مەجید، ئەندامی ئەنجومەنی سیاسی كۆمەڵی ئیسلامی كوردستان لەوبارەیەوە دەڵێت؛ هەر چوار لایەنەكە چاوەڕێی ئەنجامی سكاڵاكانیان دەكەن لەسەر ئەنجامی هەڵبژاردنەكە و تا ئەوە یەكلا نەبێتەوە بەشداری هیچ گفتوگۆیەك ناكەین و لەوباریەوە وتى: "قۆناغى یەکەم تا ئەوە رون نەبێتەوە بڕیارمان نیە هیچ هەڵوێستیکى سیاسى وەربگرین و بەدەم هیچ بانگهێشتانەمەیەکەوە بچین".

دەشڵێت:"ئەگەر بانگهێشتنامەیەکى فەرمیشمان ئاڕاستە بکرێت، پێویستە هەر چوار لایەن لەسەر ئاستى باڵا کۆببنەوە و تاوتوێى بکەن، بۆئەوەى بڕیارێکى پێکەوەیى بدەین".