ناوه‌رۆكی كۆبونه‌وه‌ی تایبەت بە یاسای چاکسازی لە موچە و خانەنشینی
پەرلەمانتارێکی گۆڕان رایدەگەیەنێت؛ وه‌كو فراكسیۆنی گۆڕان له هه‌ردو لیژنه‌ی دارایی و یاسایی دژی مادەی سێی یاسای چاكسازی له موچه و خانه‌نشینین و رایدەگەیەنێت؛ لە کۆبونەوەکەی ئەمڕۆدا پێشنیارەکەیان رەتکرایەوە کە داوایان کردبو، خانه‌نشینیی پله‌باڵاكان هاوشێوه‌ی یاسای خانه‌نشینیی یه‌كگرتوی عێراق بێت.
ئه‌مڕۆ (دوشه‌ممه) هه‌ردو لیژنه‌ی دارایی و یاسایی په‌رله‌مانی كوردستان كۆبونه‌وه بۆ گفتوگۆ له‌باره‌ی راپۆرتی تایبه‌ت به یاسای چاكسازی له موچه و خانه‌نشینی.
دكتۆره به‌هار مه‌حمود، په‌رله‌مانتاری فراكسیۆنی گۆڕان له په‌رله‌مانی كوردستان بە (سبەی) راگه‌یاند، له كۆبونه‌وه‌کەدا كه به ئاماده‌بونی سه‌رۆكایه‌تی په‌رله‌مان به‌ڕێوه‌چو سه‌باره‌ت به ئاماده‌كردنی راپۆرتی تایبه‌ت به یاسای چاكسازی له موچه و خانه‌نشینی، هه‌مان پێشنیاره‌كانی ماوه‌ی رابردوی فراكسیۆنی گۆڕان له یاساكه‌دا چه‌سپێنران.
وتی: پێشنیاری یه‌كه‌می گۆڕان بریتی بو له‌وه‌ی كه له‌كاتی جێبه‌جێكردنی یاساكه‌دا ئه‌و ماده‌یه‌ی تایبه‌ته به بڕینی ده‌رماڵه‌ی فه‌رمانبه‌ران لاببرێت، پێشنیاری دوه‌میش نه‌مانی سیسته‌می پاشه‌كه‌وتی موچه بو له‌كاتی جێبه‌جێكردنی یاساكه‌دا، هه‌روه‌ها پێشنیاری سێیه‌م بریتی بو له‌وه‌ی هیچ خانه‌نشینێكی مه‌ده‌نی نابێت بڕی خانه‌نشینییه‌كه‌ی له (400) هه‌زار دینار كه‌متر بێت.
ئەو پەرلەمانتارە ئاماژەی بەوەکرد، هه‌رچه‌نده زۆر پێداگری كرا له‌سه‌ر ئه‌وه‌ی پێشنیاره‌كانی گۆڕان سه‌رنه‌گرێت یان گۆڕانكارییان تێدا بكرێت، "به‌ڵام ئێمه وه‌ك نوێنه‌رانی گۆڕان زۆر پێداگریمان له‌سه‌ر پێشنیاره‌كانمان كرد و توانیمان له راپۆرته‌كه‌دا بیانچه‌سپێنین".
بەوتەی پەرلەمانتارەکەی گۆڕان، مه‌به‌ستی سه‌ره‌كیی كۆبونه‌وه‌كه‌ی ئه‌مڕۆ بریتی بو له گۆڕانكاری له ماده‌ی سێی ناو یاساكه كه تایبه‌ته به خانه‌نشینیی پله‌باڵاكان و لەمڕوەوە وتی: "ئێمه وه‌كو فراكسیۆنی گۆڕان له رابردوداو له كۆبونه‌وه‌كه‌ی ئه‌مڕۆشدا داوامان كرد خانه‌نشینیی پله‌باڵاكان هاوشێوه‌ی یاسای خانه‌نشینیی یه‌كگرتوی عێراق بێت كه نابێت كه‌سانی نێو پۆسته باڵاكان خانه‌نشین بكرێت تاكو ته‌مه‌نیان نه‌گاته (50) ساڵ، به‌ڵام ئه‌و پێشنیاره‌ی ئێمه ره‌تكرایه‌وه و داوا كرا وه‌ك ئێستا بمێنێته‌وه كه به رێژه‌ی (80%)ی موچه‌كانیان خانه‌نشین بكرێن، ئه‌وه بو دواتر پێشنیارێكی دیكه كرا كه پله باڵاكان به رێژه‌ی (50%)ی موچه‌كانیان خانه‌نشین بكرێن، دواتر ئه‌و پێشنیاره له راپۆرته‌كه‌دا چه‌سپێنرا. ئێمه وه‌كو فراكسیۆنی گۆڕان له هه‌ردو لیژنه‌ی دارایی و یاسایی له‌سه‌ر راپۆرته‌كه نوسیومانه دژی ماده‌ی سێین".