کاوە محەمەد: گۆڕان و هاوپەیمانەکانی بەرگرییان لە پڕۆسەی دیموکراسی کرد
کاوە محەمەد، رایدەگەینێت؛ ئەوەی گۆڕان لەماوەی رابردودا لەگەڵ لایەنە هاوپەیمانەکانی لە بەغدا ئەنجامیدا بەرگریکردن بو لە پڕۆسەی دیموکراسی و گێڕانەوەی دەنگی هاوڵاتیان، بەڵام لەبەرامبەردا لایەنە ساختەکارەکان لە یەکەم رۆژەوە هەوڵی بەدەستهێنانی پۆست و پلە و دژایەتیکردنی بەرەی دژ بە ساختەکاری و تەزویر بو، بەڵام سەرکەوتو نەبون.
کاوە محەمەد، ئەندامی ئەنجومەنی نوێنەرانی عێراق لە فراکسیۆنى گۆڕان رایدەگەیەنێت:"لە یەکەم رۆژی دوای ئاشکراکردنی ئەنجامە بەراییەکانی هەڵبژاردن و ئەو ساختەکارییە زۆرانەی لە هەرێم و عێراق کرابون، بزوتنەوەی گۆڕان وەکو یەکەم لایەن تەواوی پڕۆسەکەی رەتکردەوە و دواتر لەگەڵ لایەنەکانی دیکەی وەک کۆمەڵ و یەکگرتو و هاوپەیمانی هەوڵەکانیان چڕکردەوە بۆ ئاشکراکردنی ئەو ساختەکارییانە".
ئەوەش دەخاتەڕو؛ ئەوانەی تەزویریان لە هەڵبژاردنەکەدا کرد و ئەوانەشی لێی سودمەندبون، لە سەرەتاوە بەرەیەکیان بەرامبەر ئەو لایەنانە پێکهێنا بۆ ئەوەی راستیەکان ئاشکرا نەبێت، بەڵام سەرکەوتو نەبون و دەڵێت: "تەزویر و ساختەکاری لای یەکێتی و پارتی بوە بە کەلتور تا واى لێهات رێزیان بۆ دەنگی دەنگدەران و پڕۆسەی هەڵبژاردن نەهێشتەوە".
کاوە محەمەد لەو لێدوانەیدا بۆ دەنگى گۆڕان باسی لەوەکرد، یەکێتی و پارتی شاگردەکانیان لەدوای راگەیاندی ئەنجامەکانەوە، راستەوخۆ وەفدیان رەوانەی بەغدا کرد، بۆ ئەوەی شانی بەرپرسانی عێراق ماچ بکەن و بکڕوزێنەوە تا لە حکومەتی داهاتو پۆست وەربگرن و بە دەنگی تەزویرەوە بەشداری لە حکومەتی داهاتودا بکەن.