گۆڕان و کۆمەڵ و یەکگرتو: دەنگی حەق لەکۆتاییدا سەرکەوت
فراکسیۆنەکانی گۆڕان و کۆمەڵ و یەکگرتو لە پەرلەمانی عێراق دەڵێن: ئەوەی ئەمڕۆ لە پەرلەمان رویدا سەرکەوتنێکی گەورەی دەنگی حەق بو بەسەر تەزویرچی و ساختەکاراندا، دەشڵێن: یاساکە هیوا و ئومێد بۆ تەواوی دەنگدەران دەگێڕێتەوە.
دوای پەسەندکردنی پڕۆژە یاسای هەمواری سێیەم یاسای هەڵبژاردنەکان، فراکسیۆنەکانی گۆڕان و کۆمەڵ و یەکگرتو، کۆنگرەیەکی رۆژنامەوانیان ئەنجامدا.
ئەمین بەکر، سەرۆکی فراکسیۆنی گۆڕان رایگەیاند؛ ئەوەی ئەمڕۆ رویدا سەرکەوتنی هەمو ئەو لایەنانەیە کە لەگەڵ راستی و حەقدابون و دژی کەسانی ساختەکار بو، هەروەها ئامانجی ئەوان دەرخستنی دەنگی راستەقینەی لایەنەکان.
لای خۆیشییەوە موسەنا ئەمین، سەرۆکی فراکسیۆنی یەکگرتوی ئیسلامی وتی: پیرۆزبایی لە تەواوی خەڵکی کوردستان و عێراق دەکەن بەبۆنەی ئەو سەرکەوتنەوە، کە هاوڵاتیان بە یاسا مافەکانیان گەڕێندرایەوە، ئەوەی ئەمڕۆش رۆژێکی مێژویی بو لە کاری سیاسی پەرلەمانی عێراقدا، کە رێگەی نەدا ساختەکاران سەربکەون.
هاوکات سەلیم شوشکەیی، ئەندامی ئەنجومەنی نوێنەرانی عێراق لە فراکسیۆنی کۆمەڵ رایگەیاند؛ ئەوەی ئەمڕۆ لە پەرلەمان رویدا، گەڕانەوەی هیوا و ئومێد بو بۆ هاوڵاتیان، تاوەکو بزانن دەنگیان بەکێ داوە، ئەوەش هۆکارێکی گرنگ دەبێت کە هاوڵاتیان بە گڕوتینی زیاترەوە بەشداری هەڵبژاردنەکانی (30)ی ئەیلولی ئەمساڵی هەرێم بکەن.