پەرلەمانتارێکى کورد رایدەگەینێت؛ عێراق خاوەنى پلانى ستراتیژى نەبوە بۆ دروستکردنى بەنداوى گەورە بۆ ئەوەى لەکاتى پێویست بەکارى بهێنێت و دەڵێت"ئێران ‌و توركیاش پابەندی یاسا نێودەوڵەتیەكانی تایبەت بە بەردانەوەی ئاو نەبون و ئەو پرسە بە سیاسی كراوە"

كاوە محەمەد، ئەندامی ئەنجومەنی نوێنەرانی عێراق لە فراكسیۆنی گۆڕان لەبارەى سەرهەڵدانى قەیرانى ئاو و گرتنەوەى ئاو لەلایەن تورکیا و ئێرانەوە دەڵێت: "تائێستا توركیا ‌و ئێران پابەندی یاسا نێودەوڵەتییەكانی تایبەت بە بەردانەوەی ئاو ‌و سەرچاوە ئاوییەكان نەبون ‌و پرسەكەیان زیاتر بە سیاسی كردوە، بەشێوەیەک گومانێکى گرتنەوەی سەرچاوە ئاوییەكان لەلایەن ئەو دو وڵاتەوە لەم كاتەدا بەو ئاڕاستەیەیە کە بیانەوێت سەرچاوە ئاوییەكان وەك كارتی فشار لەسەروبەندی پێكهێنانی حكومەتی نوێی عێراق بەکاربهێنن بۆ جێکردنەوەى خواستەکانیان".

کاوە محەمەد رونی دەکاتەوە کە عێراق خۆشى لە ماوەى رابردودا خاوەنى پلانى ستراتیژى نەبوە بۆ دروستکردنى بەنداوى گەورە بۆ ئەوەى لەکاتى پێویست بەکاربهێنرێت و سود لە ئاوەکە وەربگرێت، "بۆیە دەبێت عێراق رۆڵى خۆى بگێڕێت بۆ چارەسەرى یان کەمکردنەوەى کاریگەرى ئەو گرتنەوى ئاو لەلایەن ئەو دو وڵاتەوە".