فراكسیۆنەكانی گۆڕان، كۆمەڵ، یەكگرتو‌ لە پەرلەمانی عێراق رایدەگەیەنن؛ دەبو سەرۆك كۆمار پارێزەری لە دەستوری عێراق بكردایە، نەک خۆی بخاتە سەنگەری بەرگریی کردن لە ساختەکارەکانەوە و پێویستە سەرۆکی هەمو عێراق بێت، نەک حیزبەکەی یان لایەنێکی سیاسی دیاریکراو.

دواى نیوەڕۆى ئەمڕۆ پێنجشەممە، هەر سێ فراکسیۆنى گۆڕان و کۆمەڵى ئیسلامى کوردستان و یەکگرتوى ئیسلامى کوردستان لە پەرلەمانى عێراق راگەیەندراوێکیان بڵاوکردەوە و تێیدا ئەوەیان خستوەتەڕو کە؛ تائێستا هەڵوێستی جدیمان لە سەرۆك كۆمار نەبینو‌ە لەسەر پێشێلكردنی دەستور لە رابردودا و دەبو سەرۆك كۆمار پارێزگاریى لە دەستوری عێراق بكردایە، نەک ئەو کەسانەی پێشێلی دەستور و دادپەروەری و نەزاهە دەکەن.

هەرسێ فراکسیۆنەکە رایانگەیاندوە: بەپێی دەستور، سەرۆک کۆمار پارێزەرو بەرگریکاری دەستورە، بەڵام بەداخەوە لەماوەی رابردودا هەڵوێستێکی لەو شێوەیەمان لێ نەبینوە بەرامبەر ئەو پێشێلکاریی و یاسا شکێنیانەی کە لەماوەی رابردودا لە عێراق و هەرێمی کوردستان ئەنجامدراون، بەڵام ئەمڕۆ دەستوەردان لەبابەتێکدا دەکات کە لە تایبەتمەندی ئەو نییە و لەدەرەوەی دەسەڵاتە دەستورییەکانییەتی، ئەوەش لە رێگەی ناردنی نوسراو بۆ دادگای فیدراڵی سەبارەت بە هەڵبژاردنەکانی عێراق و بەوەش خۆی خستوەتە سەنگەری بەرگریی لە ساختەکارەکانەوە.

ئەو سێ فراکسیۆنە ئاماژەیان بەوەکردوە کە بەپێی مادەی (67)ی دەستوری عێراق، سەرۆک کۆمار رەمزی یەکێتی وڵاتە و گرەنتی پابەندبون بە دەستورەوە دەکات و بەپێی مادەی (68)ی دەستور، سەرۆک کۆمار زامنی دەستەبەرکردنی دادپەروەری و نەزاهە دەکات، بەڵام "تێناگەین کە جێبەجێکردنی یاسا و گەڕاندنەوە و پاراستنی مافی دەنگدەران و دەنگی شەقام و لێپرسینەوە لە ساختەچییەکان، پێشێلکردنی دەستورە، یان بەرگریی کردن لەو کەسانەی کە دەستوریان شکاندوە".

فراکسیۆنەکانی گۆڕان و کۆمەڵ و یەکگرتو لە پەرلەمانی عێراق، رایانگەیاندوە: دەسەڵاتەکانی سەرۆک کۆمار لە مادەی (73)ی دەستوردا هاتوە و هیچ مافێکی نییە کە دەستوەردان لەکاری یاسادانان بکات کە بەرزترین دەسەڵاتە لە عێراقدا، رەنگە بیری چوبێت پۆستەکەی ئەویش لە رێگەی پەرلەمانەوە دیاری دەکرێت و سیستمی حوکمی عێراق پەرلەمانییە.

هەروەک جەختیان کردوەتەوە؛ مادەی (102) دەستور باسی لە کۆمسیۆنی باڵای هەڵبژاردنەکانی عێراق کردوە کە دەچێتە ژێر چاودێریی و سەرپەرشتی پەرلەمان و پەرلەمان پەیوەستە بە چاودێری و بەدواداچونی کارەکانی و خودی کۆمسیۆنیش لەلایەن پەرلەمانەوە پێکدەهێنرێت و مافی پەرلەمانە کە یاساکەی هەموار بکاتەوە بۆ بەرژەوەندی گشتی.

لە کۆتایی راگەیەندراوی سێ فراکسیۆنەکەدا هاتوە؛ لەو روانگەیە و لەدیدی بەرژەوەندی گشتیی و بەرژەوەندییەکانی وڵاتەوە داوا لە سەرۆک کۆمار دەکەین کە رێز لە دەستور و دەسەڵاتەکانی دیکە بگرێت و بێلایەنی خۆی بپارێزێت و چیتر بەرگریی لە ساختەکار و گەندەڵەکان نەکات، پێویستە سەرۆکی هەمو عێراق بێت، نەک حیزبەکەی یان لایەنێکی سیاسی دیاریکراو.