پەرلەمانتارێک ئاشکراى دەکات پرۆژە بڕیارێك هەیە بۆ هەڵوەشاندنەوەی كۆمیسیۆنى باڵاى هەڵبژاردنەکانى عێراق و دەڵێت:" ئەگەر کۆمیسیۆن پابەندى بڕیارەکانى پەرلەمان نەبێت ئەوا کار لەسەر ئەو پڕۆژە یاسایە دەکەین".

ئەمین بەكر، سەرۆكی فراكسیۆنی گۆڕان لە ئەنجومەنى نوێنەرانى عێراق دواى دانیشتنەکەى ئەمڕۆ کە پڕۆژە بڕیارێکى تێدا پەسەند کرا لەبارەى هەڵبژاردنەکانى (12)ى ئایارەوە رایگەیاند؛ لە رۆژى دواى هەڵبژاردنەکە و دەرکەوتنى ساختەکارى تییدا لەسەر چەند ئاستێك لە هەوڵدا بوین بۆ ئەوەی ئەنجامی هەڵبژاردن هەڵبوەشێتەوە‌ و راستی ‌و دروستی دەنگدان دەربكەوێت.

ئاماژەى بەوەشکرد لە چەند ئاستێک کار لەسەر ئەو پرسە دەکرێت و جەختى لەوە کردەوە ئەو لیژنەیەى ئەنجومەنى وەزیرانیش پێکى هێناوە کاریگەرى و رۆڵى باشى هەیە و لاى خۆیەوە قەزا سەرقاڵى وردبینییە.

وتیشی: "دانیشتنی ئەمڕۆی پەرلەمان بۆیە بەكراوەیی هێڵدراوەتەوە، چونكە پرۆژە بڕیارێك هەیە بۆ هەڵوەشاندنەوەی كۆمیسیۆنی باڵای هەڵبژاردنەكان و جێگرتنەوەى بە لیژنەیەکى قەزایى، بۆیە ئەگەر کۆمیسیۆن بەرەو ئەوە نەچێت پابەندى بڕیارەکانى پەرلەمان بێت ئەوا کار لەسەر ئەو پڕۆژە یاسایە دەکەین".