یوسف محەمەد: ئەزمونی کورد لەگەڵ نەوتدا لە عێراق خراپتر نەبێت باشترنیە
یوسف محەمەد رایدەگەیەنێت؛ ئەزمونی کورد لەگەڵ نەوتدا ئەگەر لە عێراق خراپتر نەبێت باشترنیە، دەشڵێت:"ئەگەر بە جۆرێکی تر مامەڵە لەگەڵ نەوتدا نەکەین ئەوا لە بری سەربەخۆیی رەنگە ببێتە مایەی ئەوەی لە دەرەوە حوکم بکرێین، رێك وه‌ك ئه‌وه‌ی ئێستا له هه‌رێمی كوردستان ئه‌یبینین".
د. یوسف محەمەد، له وتارێکدا کە لە كۆنفڕانسی وزه‌ی (2018)ى عێراق به ناوی (نه‌وتی هه‌موان بۆ هه‌موان) پێشکەشى کرد، رونیکردەوە؛ لە مێژوی عێراقدا زۆرینەی سامانی نەوت یان بۆ تێرکردنی ئارەزوی سەرکردە سیاسیەکان بەکارهێنراوە یان بۆ کڕینی چەک، "دەرئەنجامی ئەمە ئەوەیە کە لە وڵاتێکی دەوڵەمەندی وەک عێراقدا خەڵکێکی زۆر لە پێداویستیە سەرەتاییەکانیان بێبەرین، بەهیوا بوین کورد ئەزمونێک لەم مێژوە وەربگرێت و مۆدێلێکی جیاواز پێشکەش بکات، بەڵام ئەزمونی کورد لەگەڵ نەوتدا ئەگەر خراپتر نەبێت باشتر نییە".
هەروەک ئاماژەى بەوەکرد لە عێراق و هەرێمى کوردستان هەتا نەوت وەک تاکە سەرچاوە بەکاربهێنرێت ئەوا لە ناوەوه و لە دەرەوەش لە بری ئەوەی ببێتە مایەی بەهێزکردنمان دەبێتە مایەی لاوازکردنمان، بۆ نمونە؛ کاتێک نەوت تاکە سەرچاوەی دارایی و ئابوری و بژێویی وڵاتە ئەوا ئابلۆقە یان گۆڕانی نرخ، یان شەڕ یان گۆڕانکاری لە جۆری وزە و گەشەی تەکنەلۆجیا هەمو دەبنە مایەی مەترسی ئەوەی کە عێراق به‌گشتی و هه‌رێم به‌تایبه‌تی له روی ئابوری و سەرچاوەی بژێویەکەی لاواز بکەن.
وتیشى: "ئەگەر بە جۆرێکی تر مامەڵە لەگەڵ نەوتدا نەکەین ئەوا لە بڕی سەربەخۆیی رەنگە ببێتە مایەی ئەوەی لە دەرەوە حوکم بکرێین، رێك وه‌ك ئه‌وه‌ی ئێستا له هه‌رێمی كوردستان ئه‌یبینین".