عەلی حەمەساڵح، جێگری سەرۆکی لیژنەی دارایی و ئابوری لە پەرلەمانی کوردستان، سەبارەت بە بڕیاری حکومەتی هەرێم بۆ دەستکاریی کردنی پاشەکەوتی موچە رایگەیاند: باشکردنی موچه‌و نه‌هێشتنی پاشه‌که‌وت کارێکی پێویسته‌، به‌ڵام ده‌بێت پاشه‌که‌وت نه‌مێنێت و مانگانه‌ موچه‌ بدرێت.

رایگەیاند: حکومەتی هەرێم داهاتی نەوتی مانگانە بە (375) ملیار دینار داناوە، لەکاتێکدا داهاتی به‌رهه‌مه‌ نه‌وتییه‌کان و تانکه‌ر بۆ (35) هه‌زار به‌رمیلی رۆژانه (63) ملیار دیناره و (312) ملیار دیناری مانگانه‌ بۆ فرۆشتنی (350) هه‌زار به‌رمیل به‌ڕێگای بۆری ده‌مێنێته‌وه.

ئەو پەرلەمانتارە ئاشکرای کردوە؛ بۆ هه‌ر به‌رمیلێک نه‌وت (24) دۆلارو (76) سه‌نت ده‌مێنێته‌وه‌ له‌ کاتێکدا نرخی نه‌وتی برێنت (69) دۆلاره، واته‌ به‌ به‌راورد به‌ نرخی برێنت (29%)ی داهات دێته‌وه‌ خزمه‌تی خه‌ڵک.

سەبارەت بە ناردنی پارە لەلایەن بەغداوە، پێیوایە ئەوکارە کاتییە و تا بڵاوکردنه‌وه‌ی یاسای بودجه‌ی عێراقه‌ له‌ رۆژنامه‌ی وه‌قائعی رەسمی و ئه‌نجامدانی هه‌ڵبژاردنه‌کان، چونکه‌ به‌پێی یاسای بودجه‌ی عێراق هه‌رێمی کوردستان ده‌بێت رۆژانه (250) هه‌زار به‌رمیل نه‌وت بداته‌ به‌غدا، نه‌ک هه‌رێم نه‌وتی خۆی بفرۆشێت و به‌غداش پاره‌ بدات.

عەلی حەمەساڵح ئاشکرای کردوە کە؛ حەیدەر عەبادی سەرۆک وەزیرانی عێراق پارە دەنێرێت بۆ هەرێمی کوردستان بۆ ئه‌وه‌ی بکرێته‌وه‌ بە سه‌رۆک وه‌زیران لە خولی داهاتودا، که‌ کرایه‌وه‌ سه‌رۆک وه‌زیران، یاسای بودجه‌ جێبه‌جێده‌کات، بەوپێیەش ناردنی پارە لەلایەن بەغداوە و چاککردنی پاشه‌که‌وتی موچه‌ کاتییه‌.