دوا بەدوای کۆبونەوەی ئەمڕۆی نوێنەرانی هەر چوار لایەنەکە لە سلێمانی، کاوە محەمەد نوێنەری بزوتنەوەی گۆڕان لە کۆنگرەیەکی رۆژنامەوانی هاوبەشەدا لەگەڵ نوێنەری سێ لایەنەکەی دیکە رایگەیاند؛ هەر چوار لایەنی گۆڕان و کۆمەڵ و یەکگرتو و هاوپەیمانی رێککەوتن لەسەر دروستکردنی هاوپەیمانێتییەک بۆ هەر چوار فراکسیۆنەکە لە پەرلەمانی عێراق و هەروەها داڕشتنەوەی کارنامەی هاوبەش بۆ هاوپەیمانێتییەکە بە جۆرێک لە خزمەتی بەرژەوەندی گشتی و کاری هاوبەش و بەرگریی کردن بێت لەسەر مافە دەستورییەکانی هاوڵاتیانی هەرێمی کوردستان و بە دامەزراوەیی کردنی پەیوەندییەکانی نێوان هەرێمی کوردستان و حکومەتی ناوەندی.

رایگەیاند کە لە گفتوگۆی پێکهێنانی حکومەتدا، ئەو هاوپەیمانێتییە پێداگریی دەکات لەسەر چارەسەری ریشەیی بۆ مافە دەستوریەکانی هەرێم بەتایبەتی پێکهێنانی ئیدارەی هاوبەش بۆ ناوچە جێناکۆکەکان و چارەسەری بودجە و موچە و ماف و شایستە داراییەکانی هەرێمی کوردستان.

هەر چوار لایەنەکە رایانگەیاند: لەسەر ئاستی عێراق داوای پێداچونەوە بە پرۆسەی سیاسی و ئیداریی عێراق دەکەن لەسەر بنەمای هاوبەشیی راستەقینە و سازان و پێکهێنانی دەوڵەتی هاوڵاتی و بە دامەزراوەیی کردنی دەوڵەت و سەروەریی یاسا.

بەیاننامەی هاوبەش

لەژێر رۆشنایی کۆبونەوەی لوتکەی هەر چوار لایەنی سیاسی، لە رۆژی (11/8/2018)، ئەمڕۆ (26/8/2018) هەر چوار لایەنی سیاسی (بزوتنەوەی گۆڕان، کۆمەڵی ئیسلامی، یەکگرتوی ئیسلامی، هاوپەیمانی بۆ دیموکراسی و دادپەروەریی) لە شاری سلێمانی کۆبونەوە و گفتوگۆمان لەسەر کاری پێکەوەیی کرد لە نێوان هەر چوار لایەنەکە و لەسەر ئەم خاڵانە رێککەوتین:

1-دروستکردنی ئیئتیلافێک بۆ هەر چوار فراکسیۆن.

2-داڕشتنی کارنامەیەکی هاوبەش بۆ ئیئتیلافەکە کە لە خزمەتی بەرژەوەندییە گشتییەکان و بەرگریی کردن لە مافە دەستورییەکانی خەڵکی کوردستان و بە دامەزراوەیی کردنی پەیوەندییەکانی نێوان هەرێم و حکومەتی فیدراڵ بێت،

3-ئەم ئیئتیلافە لە پێکهێنانی حکومەتی عێراقدا پێداگریی لەسەر چارەسەرکردنی ریشەیی کێشەکانی هەرێم و حکومەتی فیدراڵی و مافە دەستورییەکانی خەڵکی کوردستان دەکات، بەتایبەتی گێڕانەوەی شکۆ و ئیدارەی هاوبەش بۆ ناوچە جێناکۆکەکان و چارەسەرکردنی کێشەی بودجە و موچە و شایستە داراییەکانی خەڵکی هەرێمی کوردستان و دروست کردنی ئەو دەستە و دامەزراوانەی کە گرەنتی مافەکانی خەڵکی کوردستان دەکات.

4-لەسەر ئاستی عێراقیشدا داوای پێداچونەوە بە تەواوی پرۆسەی سیاسی و ئابوریی عێراق دەکات کە لە قۆناغی تازەدا لەسەر بنەمای شەراکەت، سازان، هاوسەنگی، دەوڵەتی هاوڵاتی بون، ماف و خزمەتگوزاریی، شەفافیەت، دامەزراوەیی و سەروەریی یاسا بونیات بنرێتەوە.

         بزوتنەوەی گۆڕان         کۆمەڵی ئیسلامی کوردستان
یەکگرتوی ئیسلامی کوردستان       هاوپەیمانی بۆ دیموکراسی و دادپەروەریی

26/8/2018