بەپێی زانیارییەکانی (کەی ئێن ئێن) کە لەسەرچاوەیەكی تایبەتەوە دەستی كەوتون، هەریەك لە بزوتنەوەی گۆڕان و كۆمەڵی ئیسلامی و یەكێتی نیشتمانی و هاوپەیمانی بەرەو ئیسڵاح، كە لە یەكگرتوی ئیسلامی و بزوتنەوەی ئیسلامی پێكدێت، لە كۆمسیۆنی هەڵبژاردن و راپرسی هەرێم تانەیان لە خاوێنی تۆماری دەنگدەران داوە.

بەوتەی سەرچاوەکە: ئەو پێنچ لایەنە بەجیا تانەیان لە تۆمارە نوێكەی كۆمسیۆن داوە و بەبەڵگەوە ناو و زانیاری ئەو كەسانەیان خستۆتەرو، كە خەڵكی بەشەكانی تری كوردستانن و ناویان لە تۆماری دەنگدەران هەیە، هەروەها ناوی ئەو كەسانەشیان رادەستی كۆمسیۆن كردوە كە مردون و ناوەكانیان نەسڕاوەتەوە، لەگەڵ ئەوەشدا بەشێك لە هاوڵاتیانی كوردی دانیشتوی ناوچە جێناكۆكەكان ناویان لە تۆماری دەنگدەران ماوە.

بەپێی زانیاریەكانیئەو لایەنانە رەخنەی ئەوەشیان لە تۆمارەكە گرتوە كە دەبوایە تۆمارەكە بە سیستمی "پی دی ئێف" بڵاو نەكرابایەوە، بەڵكو بە سیستمی ئێكزڵ رادەستی لایەنەكان بكرایە بۆ ئەوەی ئەو لایانانە بتوانن ناو و زانیاری دەنگدەرانی هەرێم بە ئاسانی بەراورد بكەن.

 یەكێك لەو لایەنە سیاسیانە داوایكردوە كۆمسیۆن ئەو تۆمارە بڵاو بكاتەوە، كە گۆڕانكاری تێدا كراوە، یان ناوەكانیان راستكراوەتەوە یان لە شوێنێكەوە بۆ شوێنێكی تر گوازراونەوە، یان ئەو كەسانەی، كە ناویان لە تۆمارەكە نەبوە و زیاد كراون بۆ ئەوەی بەراورد بكرێنەوە بە تۆمارە كۆنەكە.

سەرچاوەکە ئاماژەی بەوەکردوە، یەكێك لەو لایەنە سیاسیە تانەی ئەوەی لە تۆمارەكەداوە، كە بەشێك لەو كەسانەی ناویان لە تۆمارەكە هەیە تەمەنیان لە خواروی هەژدە ساڵیەوە، هەمان لایەن نایاساییەكی تری كۆمسیۆنی ئاشكرا كردوە ئەویش ئەوەیە، كە ئەو كەسانەی پێشتر موچەكانیان لەسەروی یەك ملیۆن و (500) هەزار دینارەوە بوە، فۆرمی خۆراكیان لێ سەندراوەتەوە، ئەم تۆمارە نوێیەش پشتی بە فۆرمی خۆراك بەستوە، بەوەش ئەو كەسانە لە مافی دەنگدان بێبەش كراون.

سەرباری ئەوەش ئەو كەسانەی ناویان لەسەروی (90) ساڵیەوەیە ناوەكانیان سڕكراوە، لە كاتێكدا بەشێكیان لە ژیاندا ماون.

سەرچاوەكەیکەی ئێن ئێن دەڵێت: لایەنێكی سیاسی هەرێم تانەی ئەوەی لە تۆمارە نوێكەی كۆمسیۆن داوە، كە پێشتر ژمارەی دەنگدەرانی پارێزگای هەولێر یەک ملیۆن و (123) هەزار و (219) كەس بوە دوای سڕكردنی ناوی (200) هەزار كەس، كەچی ژمارەی دەنگدەرانی پارێزگای هەولێر تەنها حەوت كەس كەمیكردوە و بوە بە یەك ملیۆن و (123) هەزار و (212) كەس، ئەو لایەنە داوای رونكردنەوەی لە كۆمسیۆن كردوە.

جگە لەوەش ئەو پێنچ لایەنە بڕیاریانداوە ئەگەر كۆمسیۆن وەڵامی تانەكانیان نەداوە و ناوی مردو و كوردانی رۆژهەڵات و رۆژئاوا و باكور لە تۆماری دەنگدەران لانەبرێن ئەوە پەنا بۆ دادگا دەبەن و بەڵگەكان رادەستی دادگا دەكەن، پێدەچێت دواتر تەواوی ئەو بەڵگانە بۆ رایگشتی ئاشكرا بكەن.