رێکخەری ژوری پەیوەندییە دبلۆماسییەکان لە بزوتنەوەی گۆڕان ئاماژە بەوە دەکات، راگەیاندنی ئەنجامی ژماردنەوەی دەستی دەنگەکان، بۆ پەردەپۆشکردنی ساختەکارییە گەورەکە بو، دەڵێت: تانە لە ئەنجامەکان دەدەن.

هۆشیار عومه‌ر عه‌لی، رێکخه‌ری ژوری په‌یوه‌ندییه‌ دیپلۆماسیه‌کانی بزوتنه‌وه‌ی گۆڕان به‌ سایتی (ناشناڵ)ی راگەیاند؛ ئه‌نجامه‌کانی هەڵبژاردن پاش ژماردنه‌وه‌ی بەشێکی سندوقەکانی دەنگدان، په‌رده‌پۆشکردنێکی گه‌وره‌ی ئه‌و ته‌زویره‌ بەرفراوانە بو که‌ له‌ هه‌ڵبژاردنی (12)ی ئایاردا ئه‌نجامدرا، هه‌ڵبژاردنه‌که‌ به‌ هه‌مو پێوه‌ره‌کان کاره‌سات بو، بۆیە تانه‌ له‌ ئه‌نجامه‌کانی کۆتایی ده‌ده‌ین.

پێشبینی زیادبونی ناسەقامگیری کرد لە عێراق و وتی: "بەهۆی ئەوەی کە رێژه‌ی به‌شداری نزم بو و ئه‌نجامه‌کانیش ره‌نگدانه‌وه‌ی ئیراده‌ی ده‌نگده‌ران نین، پێشبینی ده‌که‌ین ناسه‌قامگیری زیاد بکات". هەروەک بەدوری نەزانی عێراق ببێتە مه‌یدانی شه‌ڕ بۆ کێبڕکێ له‌ ئاستی ناوچه‌که‌ و نێوده‌وڵه‌تی و هه‌ڵکشانی گرژییه‌کان.

بەپێی راگەیەنراوی کۆمسیۆنی باڵای سەربەخۆی هەڵبژاردن، رێژەی بەشداری دەنگدەران لە هەڵبژاردنە پەرلەمانییەکەی (12)ی ئایار گەیشتە (44.5%)، ئەوەش بە کەمترین رێژەی بەشداری لە پرۆسەکانی هەڵبژاردن دادەنرێت لە دوای روخانی رژێمی سەدام حسێنەوە.

لە نوێترین هەڵوێستیشدا بەرامبەر ئەنجامی جیاکردنەوەی دەستی بەشێک لە سندوقەکانی دەنگدان، هەریەکە لە (بزوتنەوەی گۆڕان، کۆمەڵی ئیسلامی، یەکگرتوی ئیسلامی و هاوپەیمانی بۆ دیموکراسی و دادپەروەری) ئەنجامەکانیان رەتکردەوەو لە بەیاننامەیەکدا رایانگەیاند؛ رێکاری یاسایی و سیاسی پێویست دەگرینەبەر لە پێناو گێڕانەوەی متمانە بۆ پرۆسەی سیاسی و پاراستنی دەنگی دەنگدەرانمان.