له‌یادی 16/3دا، هه‌رسێ لایه‌نی ئۆپۆزسیۆن یاداشتێك بۆ سه‌رۆكایه‌تی په‌رله‌مانی كوردستان ده‌خه‌نه‌ڕو
به‌ڕێز/ سه‌رۆكایه‌تی په‌رله‌مانی كوردستان
بابه‌ت/ یاداشت و داواكاریی
پاش سڵاو و رێز
له (16/3/1988)دا شاری هه‌ڵه‌بجه و ده‌وروبه‌ری له لایه‌ن رژێمی دكتاتۆری به‌عسه‌وه به‌ر شاڵاوی كیمیاباران كه‌وتن، كه به هه‌زاران هاوڵاتی شه‌هیدبون و هه‌زارانیش بریندار بون و، ته‌واوی هاوڵاتیانی تری هه‌ڵه‌بجه و ده‌وروبه‌ری ئاواره‌بون، سه‌ره‌ڕای ئه‌وه‌ش هه‌ڵه‌بجه و شارۆچكه و گونده‌كانی ده‌وروبه‌ری به ته‌واوی وێران بون.
بۆیه له ساڵڕۆژی ئه‌و كاره‌ساته‌دا ئێمه وه‌كو فراكسیۆنه‌كانی ئۆپۆزسیۆن له په‌رله‌مانی كوردستان، ئه‌م یاداشت و داوایانه ده‌خه‌ینه به‌رده‌ست به‌ڕێزتان، به مه‌به‌ستی جێبه‌جێكردنیان، وه‌ك هه‌نگاوێك به‌ره‌و ساڕێژكردنی برینی هاوڵاتیانی ئه‌و شاره و ده‌وروبه‌ری. با ئه‌نجامدانی ئه‌م خاڵانه دیاریی یادی كاره‌ساتی كیمیابارانی ساڵی 2012 بن، چونكه هاوڵاتیان له‌و ناوچه‌یه‌دا ماندوبون و بێ ئومێد بون له به‌ڵێن و په‌یمان و قسه‌ی زۆر.
یه‌كه‌م: به پارێزگاكردنی شاری هه‌ڵه‌بجه كه بۆته شوناسی گه‌لی كورد. داواكاریشین كه به‌پارێزگاكردنی ئه‌و شاره په‌یوه‌ست نه‌كرێت به شاره‌كانی تره‌وه. ئه‌م مه‌سه‌له‌یه‌ش له روی یاساییه‌وه هیچ كێشه‌یه‌كی تێدا نیه وه‌ك به دواداچونی بۆ كراوه.
دوه‌م: قه‌ره‌بوكردنه‌وه‌ی هاوڵاتیانی ئه‌م ناوچانه به پێی مادده‌ی 140 بخرێته پله به‌ندی یه‌كه‌م له قه‌ره‌بوكردنه‌وه‌ی (10) ملیۆن دیاره‌كه كه به پێی بڕیاری مادده‌ی (140) له حكومه‌تی ناوه‌نددا دابین كراوه.
سێیه‌م: جێبه‌جێ كردنی یاسای ماف و ئیمتیازاتی ژماره (9)ی ساڵی(2007)ی تایبه‌ت به كه‌سوكاری شه‌هید و ئه‌نفالكراوه‌كان، كه زۆربه‌ی بڕگه و مادده‌كانی بنه‌ماڵه‌ی شه‌هید و كیمیابارانی لێ مه‌حروم بوه.
چواره‌م: جێبه‌جێ كردنی پرۆژه خزمه‌تگوزاری و ئاوه‌دانییه‌كان كه له بودجه‌ی ساڵانی (2010 و 2011) و له پرۆژه بودجه‌ی ئاوه‌دانكرنه‌وه‌ی پارێزگاكاندا هاتوه.
پێنجه‌م: جێبه‌جێ كردنی بڕگه‌ی (3) له مادده‌ی (3)ی یاسای بودجه‌ی ساڵی (2011)، (100) ملیار دینار دانراوه بۆ پشتگیری پڕۆژه‌ی خزمه‌تگوزاریی بۆ قه‌زا و ناحیه‌كانی نزیك سنور، ئه‌وانه‌ی له رابردودا كۆچیان پێ كراوه، كه به پێی ئه‌م بڕگه‌یه ناوچه‌كانی هه‌ڵه‌بجه و ده‌وروبه‌ری ده‌گرێته‌وه.
شه‌شه‌م: هه‌روه‌ها داواكارین كه له بوجه‌ی تایبه‌تی گه‌شه‌پێدانی پارێزگاكاندا بڕی شایه‌ن به كاره‌ساتی هه‌ڵه‌بجه بۆ ئه‌و قه‌زایه ته‌رخان بكرێت.
هیوادارین داواكاریه‌كان به هه‌ند بگیرێن و، حكومه‌تی هه‌رێم و لایه‌نه په‌یوه‌نیداره‌كان ئیلزام بكرێن كه له یادی ئه‌مساڵی كیمیاباراندا ئه‌م بڕیارانه جێبه‌جێ بكرێن.
فراكسیۆنی گۆڕان فراكسیۆنی یه‌كگرتوی ئیسلامی فراكسیۆنی كۆمه‌ڵی ئیسلامی
12/3/2012
