ئۆپۆزیسیۆن
ئۆپۆزسیۆن: بڵاونه‌كردنه‌وه بڕیاری ژماره (2) غه‌درێكی گه‌وره‌بو ده‌رحه‌ق به خوێنی شه‌هیدان و بریندارانی (17)ی شوب
هه‌ر چوار فراكسیۆنه‌كه‌ی ئۆپۆزسیۆن له په‌رله‌مانی كوردستان داوا له سه‌رۆكایه‌تی په‌رله‌مان ده‌كه‌ن بڕیاری ژماره (2)ی ساڵی (2011) بڵاوبكه‌نه‌وه.
له یاداشته‌كه‌دا ئاماژه‌یان به‌وه‌كردوه: بڵاونه‌كردنه‌وه بڕیاری ژماره (2) له كاتی خۆیدا، جگه له‌وه‌ی پێشێلكاریه‌كی ده‌گمه‌نی ده‌ستوری و یاسایی بو، غه‌درێكی گه‌وره‌ش بو ده‌رحه‌ق به خوێنی شه‌هیدان و بریندارانی (17)ی شوبات و رۆژانی دواتر كرا، كه ئه‌و بڕیاره به‌رهه‌می خوێنی ئه‌وان بو، وه ئه‌و په‌ڕی بێڕیزی كردن بو به په‌رله‌مان و په‌رله‌مانتاران.
دەقی یاداشتەکە:
به‌ڕێزان/ سه‌رۆكایه‌تی په‌رله‌مانی كوردستان
بابه‌ت/ تكایه ده‌قی بڕیاری ژماره (2) بڵاوبكه‌نه‌وه.
په‌رله‌مانی كوردستان له به‌رواری (17/3/2011)، بڕیاری ژماره (2) ی په‌سه‌ند كرد، كه له (10) ماده و (35) خاڵ پێكهاتوه. ده‌كرێت له‌م دو خاڵه‌دا پوخته‌ی ناوه‌ڕۆك و بایه‌خی بڕیاره‌كه بخه‌ینه‌ڕو
1. به وردی زۆرینه‌ی قه‌یران و كێشه سیاسی و یاسایی و ئیداریی و داراییه‌كانی هه‌رێمی كوردستان و هۆكاره‌كانی دیاری كردوه و هێڵه سه‌ركیه‌كیه‌كانی چاره‌سه‌ریی به گۆڕانكاری و چاكسازی بۆ ده‌ستنیشانكردون.
2. بڕیاره‌كه شه‌رعیه‌تی په‌رله‌مانی و هێزی یاسای هه‌یه و جێبه‌جێكردنی ئیلزامیه بۆ هه‌مو لایه‌ك (په‌رله‌مان، سه‌رۆكایه‌تی هه‌رێم و حكومه‌ت، ده‌سه‌ڵاتی داده‌وه‌ری).
هه‌رچه‌ند ده‌قی بڕیاره‌كه له به‌رگی شه‌ست و چوارهه‌می پرۆتۆكۆله‌كانی په‌رله‌مان، لاپه‌ڕه‌كانی (475 تا 485) تۆمار كراوه، به‌ڵام له رۆژنامه‌ی فه‌رمیدا (وقایعی كوردستان) بڵاونه‌كرایه‌وه، له‌كاتێكدا ده‌بو وه‌ك هه‌ر یاسا و بڕیارێكی دیكه له لایه‌نی سه‌رۆكایه‌تی ئه‌و كاته‌ی په‌رله‌مانه‌وه له سه‌ر بنه‌مای ئه‌م ده‌قه ده‌ستوری و یاسایانه‌ی لای خواره‌وه بڵاو بكرایه‌ته‌وه.
1. له ماده‌ی 129 ده‌ستوری عێراقدا هاتوه (یاساكان له رۆژنامه‌ی فه‌رمیدا بڵاوده‌كرێنه‌وه و له رۆژی بڵاوكردنه‌وه‌یانه‌وه كاریان پێ ده‌كرێت).
2. له یاسای ژماره (4)ی ساڵی (1999) یاسای بڵاوكردنه‌وه له رۆژنامه‌ی فه‌رمیدا (وقایعی كوردستان)، له مادده‌ی (2) یدا هاتوه (وقایعی كوردستان تایبه‌ت ده‌بێت به بڵاوكردنه‌وه‌ی یاسا و بڕیاره‌كانی په‌رله‌مانی هه‌رێمی كوردستان-عێراق و ئه‌وه‌ی به هاوپێچه‌كانیان حساب ده‌كرێن یان ئه‌وه‌ی تیایدا ده‌قی گرتوه بۆ بڵاوكردنه‌وه).
3. له ماده‌ی 18 ی په‌یڕه‌وی ناوخۆی په‌رله‌مان، خاڵی 13 ده‌سه‌ڵاتی ده‌ركردنی یاسا و بڕیاره‌كان ده‌خاته ئه‌ستۆی سه‌رۆكی په‌رله‌مان به‌م شێوه‌یه (ده‌رهێنانی ئه‌و یاساو بڕیار و په‌یڕه‌وانه‌ی كه په‌رله‌مان له سه‌ریان پێكهاتوه).
4. جارێكی دیكه له ماده‌ی (78) ی په‌یڕه‌وی ناوخۆدا هاتوه (یاساو بڕیاره‌كان له لایه‌ن سه‌رۆكی په‌رله‌مانه‌وه له ماوه‌ی 10 رۆژ له مێژوی به ده‌ستگه‌یشتنیه‌وه ده‌رده‌هێنرێ).
بێگومان بڵاو نه‌كردنه‌وه بڕیاری ژماره (2) له كاتی خۆیدا، جگه له‌وه‌ی پێشێلكاریه‌كی ده‌گمه‌نی ده‌ستوری و یاسایی بو، غه‌درێكی گه‌وره‌ش بو ده‌رحه‌ق به خوێنی شه‌هیدان و بریندارانی (17)ی شوبات و رۆژانی دواتر كرا، كه ئه‌و بڕیاره به‌رهه‌می خوێنی ئه‌وان بو، وه ئه‌و په‌ڕی بێڕیزی كردن بو به په‌رله‌مان و په‌رله‌مانتاران.
بۆیه پشت به‌ستن به‌و ماده و بڕگانه‌ی سه‌ره‌وه كه پابه‌ندی بڵاوكردنه‌وه‌ی یاسا و بڕیاره‌كانی چه‌سپاندوه و ئه‌و ده‌سه‌ڵاته‌شی به سه‌رۆكی په‌رله‌مان به‌خشیوه، هه‌روه‌ها له‌و روانگه‌یه‌وه كه هه‌ردو سه‌رۆك و سكرتێری ئێستای په‌رله‌مان به‌شێكن بون له سه‌رۆكایه‌تی پێشتری په‌رله‌مان و راسته‌وخۆ یان ناڕاسته‌وخۆ هاوكارو شه‌ریك بون له شاردنه‌وه‌ی بڕیاره‌كه، وه به گه‌ڕانه‌وه بۆ وته‌كانی پێشتری سه‌رۆكی ئێستای په‌رله‌مان كه له چه‌ندین بۆنه و لێدوانی رۆژنامه‌وانیدا به‌ڵێنی دا بڕیاره‌كه بڵاوبكاته‌وه.
به‌و پێیه‌ی له چه‌ند رۆژه‌ی داهاتودا دو ساڵ به سه‌ر په‌سه‌ندكردنی بریاره‌كه‌دا تێپه‌ڕ ده‌بێت، داواكارین به‌و شێوه‌یه‌ی كه یاسا دیاری كردوه ده‌قی بڕیاره‌كه و هاوپێچه‌كانی له ڕۆژنامه‌ی فه‌رمیدا بڵاوبكرێته‌وه ، بۆ ئه‌وه‌ی له سه‌ر بنه‌مای ئه‌و بڕیاره هه‌رسێ ده‌سه‌ڵاته‌كه‌ی هه‌رێم ڕۆڵی خۆیان له پرۆسه‌ی گۆڕانكاری چاكسازی له دۆخی چه‌قبه‌ستوی هه‌رێمدا بگێڕن.
-هاوپێچ ده‌قی بڕیاری ژماره (2) كه له دوای به‌راوردكردنی (CD)ی رۆژی دانیشتنه‌كه‌ی (17/3/2011) ی په‌رله‌مان و پرۆتۆكۆلی ژماره (64) ئاماده‌مان كردوه بۆ بڵاو كردنه‌وه.
له‌گه‌ڵ رێزدا
فراكسیۆنی گۆڕان فراكسۆنی یه‌كگرتو فراكسیۆنی كۆمه‌ڵ فراكسیۆنی ئاینده
دەقی بڕیارەکە
بڕیاری ژماره(2)ی په‌رله‌مانی كوردستان..
یه‌كه‌م: لیژنه‌ی كاتی كه به پێی فه‌رمانی ژماره (1) له هه‌مو فراكسیۆنه‌كان پێكهێنراوه، هه‌ستاوه به كاره‌كانی و داخوازی خۆپیشانده‌رانیان گه‌یاندوته په‌رله‌مان و راپۆرتیان ئاماده‌كردوه و له ئه‌مڕۆوه هیچ به‌رپرسیاریه‌كیان وه‌ك لیژنه بۆ جێبه‌جێكردنی بڕیاره (17) خاڵیكه له ئه‌ستۆ نیه و ئه‌رك و كاریان كۆتایی پێهاتوه.
دوه‌م: لیژنه‌ی دیالۆگی نیشتیمانی له لایه‌ن په‌رله‌مانه‌وه به به‌شداری فراكسیۆنه‌كان پێك ده‌هێنرێت له ماوه‌ی (3) رۆژدا بۆ گفتوگۆكردن له‌گه‌ڵ لایه‌نه سیاسیه‌كان و نوێنه‌رانی خۆپیشانده‌ران و مامۆستایان و پسپۆران، وه‌ك میكانیزمێك بۆ گرتنه ئه‌ستۆی داواكاری خۆپیشانده‌ران و به‌دواداچونی و جێبه‌جێكردنیان، ئه‌م لیژنه‌یه له‌ماوه‌ی بیست رۆژدا كاره‌كانی ئه‌نجام ده‌دات به ته‌وافقی نیشتیمانی بۆ هه‌مو ئه‌و پرس و یاسایانه‌ی كه ره‌هه‌ندی نیشتیمانیان هه‌یه به تایبه‌ت خاڵه‌كانی (16،11،8،5،4،2،1) له داواكاریه بنه‌ڕه‌تیه‌كانی خۆپیشانده‌ران.
هاوپێچ: ده‌قی داواكاریه بنه‌ڕه‌تیه‌كان:
1- چاو پیاخشاندنه‌وه به ره‌شنوسی ده‌ستوری هه‌رێمدا به مه‌به‌ستی داڕشتنی ده‌ستورێكی هاوچه‌رخی دیموكرات كه تێیدا گشت مافه مه‌ده‌نی و سیاسی و یاسایه‌كانی هاونیشتیمانیان به‌ره‌سمی ناسرابن و ده‌سه‌ته‌ڵاته‌كان به ئاشكرا جیاكرابنه‌وه و سه‌ربه‌خۆییان پارێزراو بێت، هه‌روه‌ها دیاریكردنی میكانیزمی شیاو بۆ رێگاگرتن له هه‌ر جۆره لاقه‌كردنێكی ده‌سه‌ڵات. هه‌مواری یاسای سه‌رۆكایه‌تی هه‌رێمی كوردستان به شێوه‌یه‌ك كه سه‌رۆكی هه‌رێم ته‌نها له رێگه‌ی په‌رله‌مانه‌وه هه‌ڵبژێردرێ.
2- داڕشتنی پلانێكی تۆكمه بۆ دابینكردنی سه‌ربه‌خۆی دادوری و سه‌روه‌ری یاسا.
3- جیاكردنه‌وه‌ی حیزب له حكومه‌ت به جۆرێك كه ئیدی حكومه‌ت نه‌بێته ئامرازێك به‌ده‌ست حیزبی سیایه‌وه، به‌ڵكو حكومه‌ت پێویسته وه‌ك دامه‌زراوه‌یه‌كی سه‌ربه‌خۆ به‌رگریكار بێت له سه‌رجه‌م هاونیشتیمانیانی ئه‌م وڵاته.
4- هه‌ڵوه‌شانده‌نه‌وه‌ی میلیشیاكانی حیزب وه رێگرتن له‌وه‌ی حیزب خاوه‌نی هێزی چه‌كدار و ده‌زگای هه‌واڵگری و سیخۆری بێت و هه‌روه‌ها پاسه‌وانی دام و ده‌زگاو باره‌گای حزبی نه‌مێنێ و ئه‌مانیش هه‌روه‌ك ماڵی ئاسایی هاوڵاتیان سه‌لامه‌تیان له لایه‌ن هێزه‌كانی ئاسایشی ناوخۆوه بپاریزرێ.
5- سپاردنی وه‌زراتی ناوخۆ و پێشمه‌رگه و به‌ڕێوه‌به‌رایه‌تیه‌كانی ئاسایش و پۆلیس به كه‌سانی پسپۆر و بێلایه‌ن و به كرده‌وه حیزبایه‌تی له‌و ده‌زگایانه‌دا قه‌ده‌غه بكرێت.
6- كۆتایی هێنان به‌م مۆدێله له حیزب كه تێیدا كۆی كۆمه‌ڵگا داگیر ده‌كات و به ناوی هه‌موانه‌وه بڕیارده‌دات وه گۆڕینی بۆ حیزبی ده‌نگده‌ر كه پشت به خستنه‌ڕوی به‌رنامه‌یه‌كی سیاسی بۆ به‌رده‌م هاونیشتیمانیان ده‌به‌ستێت و ده‌ست له كاروباری حكومه‌ت و سه‌ندیكا و ڕێكخراوه پیشه‌یه‌كان وه‌رنادات.
7- تێنه‌په‌ڕاندنی هیچ پرۆژه‌یه یاسایه‌ك له په‌رله‌مان به بێ ئه‌وه‌ی كه پێشتر هاونیشتیمانیان له كۆڕو كۆبونه‌وه‌كاندا گفتوگۆیان له سه‌ر نه‌كردبێت و سه‌رنجه‌كانیان به هه‌ند وه‌رنه‌گیرابێت.
8- گێڕانه‌وه‌ی سه‌رجه‌م ئه‌و موڵك و ماڵه گشتی و تایبه‌تیانه‌ی كه راسته‌وخۆ یان ناراسته‌وخۆ له‌لایه‌ن هه‌ر كه‌س و لایه‌نێكه‌وه ده‌ستی به سه‌ردا گیرابێت یاخود به نرخی ره‌مزی فرۆشرابن به كه‌س و لایه‌نی دی به‌ده‌ر له یاسای فرۆشتن و به كرێدانی موڵك و ماڵی ده‌وڵه‌ت ژماره (32) ساڵی 1986.
9- به كارهێنانی سامان و بودجه‌ی كوردستان بۆ خۆشگوزه‌رانی خه‌ڵك به شێوه‌یه‌كی دادپه‌روه‌رانه له پێناو به‌دیهێنانی دادپه‌روه‌ری كۆمه‌ڵایه‌تی راسته‌قینه.
10- لێكۆڵێنه‌وه له سه‌روه‌ت و سامانی حیزبه‌كان و لێپرسراوانی حیزبی و حكومی و گێڕانه‌وه‌ی سه‌رجه‌م ئه‌و داهاتانه‌ی كه به شێوه‌ی نا یاسایی به ده‌ستیان هێناوه، وه چه‌سپاندنی بنه‌مای ئه‌مه‌ت له كوێوه هێناوه (من این لك هژا).
11- خستنه‌ڕوی سه‌رجه‌م داهاته‌كانی كوردستان بۆ رای گشتی به داهاته سروشتیه‌كانی وه‌ك نه‌وت و غاز، وه ئاشكراكردنی حسابه حكومیه‌كانی هه‌رێمی كوردستان له ناوه‌و ده‌روه‌ی وڵات.
12- هه‌ڵوه‌شاندنه‌وه‌ی سیستمی خانه‌نیشینكردنی ئه‌ندام په‌رله‌مان و وه‌زیر و به‌ڕێوه‌به‌ره گشتیه‌كان و ئه‌نجومه‌نی شاره‌وانی كه به پله‌كانی خزمه‌ت و ساڵی كاركردندا تێنه‌په‌ڕیون، وه كه‌مكردنه‌وه‌ی موچه‌كانیان به ڕێژه‌ی (50%).
13- دامه‌زراندنی ده‌سته‌ی نه‌زاهه له هه‌رێمی كوردستان به یاسا وه له ده‌ره‌وه‌ی ده‌سه‌ڵاتی جێبه‌جێكردن و په‌رله‌مان، وه سپاردنی كاره‌كانی ئه‌م ده‌زگایه به كه‌سانی بێلایه‌ن كه دیاری كرابن له سه‌ر بنه‌مای لێهاتویی.
14- رێزگرتن له سه‌ربه‌خۆی دام و ده‌زگا حكومیه‌كان، داراییه‌كان، زانكۆكان، پاراستنیان له سه‌رجه‌م ده‌سه‌ڵاته فه‌رمیه‌كانی حكومه‌تی هه‌رێمی كوردستان له ده‌ستێوه‌ردانی حیزبی.
15- بڕینی هه‌ر مینحه‌یه‌ك كه سه‌رچاوه‌كه‌ی دارایی گشتی بێت بۆ سه‌رجه‌م دام و ده‌زگا حیزبی و نا ره‌سمیه‌كان و راگه‌یاندنه‌كانیان.
16- هه‌ڵپه‌ساردنی كاركردن به یاسای خۆپیشاندنی هه‌رێمی كوردستان تا ده‌رچواندنی یاسایه‌كی نوێ كه وه‌ڵامده‌ربێت بۆ داخوازیه‌كانی رای گشتی هه‌رێمی كوردستان.
17- باشكردنی ژیان و گوزه‌رانی سه‌رجه‌م توێژه‌كانی كۆمه‌ڵگه وه‌ك كرێكاران و فه‌رمانبه‌ران و توێژه‌كانی دیكه به رچاوكردنی پێوه‌ره نێوده‌وڵه‌تیه‌كانی شایسته به مرۆڤ.
18- ئاشكراكردنی چاره‌نوسی بیسه‌رو شوێنه‌كانی شه‌ڕی ناوخۆ و بێسه‌رو شوێنكراوه‌كانی دام و ده‌زگا ئه‌منیه‌كان، وه قه‌ربوكردنه‌وه‌یان له داهاتی ئه‌و لایه‌نه‌ی به‌رپرسه له دیار نه‌مانیان.
19- كار كردن به راپۆره‌ته‌كانی دیوانی چاودێری دارایی و ئاشكرا كردن و لێپرسینه‌وه له گه‌نده‌ڵكاران و دادگایكردنیان، ده‌ركردنی یاسایه‌ك بۆ بنه‌بڕكردنی گه‌نده‌ڵی و سزادانی گه‌نده‌ڵكاران.
20- دابینكردنی بیمه‌ی ته‌ندروستی و بێكاری بۆ هه‌موان.
21- ده‌ركردنی یاسایه‌ك بۆ كۆتایهێنان به جیاكاری جه‌نده‌ری و بۆ بنه‌بڕكردنی هه‌ر توندو تیژیه‌ك دژ به ئافره‌تان.
سێیه‌م: وه‌ڵام دانه‌وه‌و جێبه‌جێكردنی داواكاریه هه‌نوكه‌ییه‌كان.
A. بۆ جێبه‌جێكردنی خاڵی (1) له ته‌وه‌ری دوه‌م (دیالۆگی نیشتیمانی) بڕیاری له سه‌ر دراوه.
B. بۆ جێبه‌جێكردنی خاڵه‌كانی (10،9،8،7،6،4،2) له دواكاریه هه‌نوكه‌یه‌كانی خۆپێشانده‌ران:
أ. ده‌ستبه‌جێ بارودۆخی شارو شارۆچكه‌كان له هه‌مو لاوه ئاسایی بكرێته‌وه و دیارده‌ی چه‌كداری نه‌مێنێت. (لیژنه‌ی ناوخۆی په‌رله‌مان به‌رپرسه له به‌دوداچونی ئه‌م خاڵه).
ب. پێویسته لایه‌نه به‌رپرسه‌كان پابه‌ندبن به جێبه‌جێكردنی بڕیاری ژماره (1)ی (23/2/2011). واته (بڕیاره 17 خاڵیه‌كه).
ج. بانگهێشتكردنی به‌رپرسانی ئه‌منی سه‌رجه‌م ئه‌و شارانه‌ی په‌یوه‌ستن به روداوه‌كانی (17/2) و دواتر پێش هاتنی وه‌زیری ناوخۆو پێشمه‌رگه بۆ لیژنه‌ی ناوخۆو لیژنه‌ی مافی مرۆڤ، و لیژنه‌ی پێشمه‌رگه بۆ ڕوبه‌ڕو كردنه‌وه‌ی پێشێلكاریه‌كانیان كه له ئه‌نجامی خۆپێشاندانه‌كان ڕویداوه.
د. راسته‌وخۆ پاش ئاهه‌نگی نه‌ورۆز وه‌زیری ناوخۆ و وه‌زیری پێشمه‌رگه بانگهێشتی په‌رله‌مان بكرێن بۆ پابه‌ندكردنیان به جێبه‌جێكردنی بڕیاری ژماره (1)ی په‌رله‌مان و رونكردنه‌وه‌و لێپرسینه‌وه.
ه. بۆ جێبه‌جێكردنی خاڵی (9) حكومه‌ت لیژنه‌یه‌ك پێكبهێنێ كه له (10) رۆژ زیاتر نه‌بێ بۆ كۆبونه‌وه له گه‌ڵ سه‌رجه‌م حیزبه‌كان بۆ كه‌مكردنه‌وه‌ی باره‌گا حیزبیه‌كان.
هاوپێچ: ده‌قی داواكاریه هه‌نوكه‌ییه‌كان:
1- دان پێدانان به كۆبونه‌وه جه‌ماوه‌ریه‌كانی كوردستان وه‌ك به‌ره‌یه‌ك بۆ نوێنه‌رایه‌تی كردنی داخوازیه‌كانی خه‌ڵك و به‌شدارپێكردنی نوێنه‌رانی خۆپیشانده‌ران له پرۆسه‌ی بریاردان له مه‌ڕ مه‌سه‌له چاره‌نوسسازه‌كاندا.
2- رێگرتن له هه‌ر جۆره هه‌وڵێك بۆ سه‌پاندنی باری نا ئاسایی به سه‌ر هه‌ر شارو شارۆچكه‌یه‌كدا له وانه بۆ نمونه دابڕاندن و ئابلوقه‌دانی شارێك یان به سه‌ر بازگه كردنی شارو شارۆچكه‌كانی كوردستان.
3- راگه‌یاندنی ره‌سمی له لایه‌ن حكومه‌ت و په‌رله‌مان و سه‌رۆكی هه‌رێم له به هه‌ند وه‌رگرتنی گشت دواكاریه‌كانی خۆپیشانده‌ران و جێبه‌جێكردنیان.
4- دروستكردنی لیژنه‌یه‌كی هاوبه‌ش له په‌رله‌مان و حكومه‌ت و بۆ كۆبه‌ونه‌وه له‌گه‌ڵ نوێنه‌رانی خۆپیشانده‌ران به مه‌به‌ستی دیاركردنی میكانیزمی گونجاو وه دیاركردنی واده بۆ جێبه‌جێكردنی داواكاریه‌كان.
5- ئازادكردنی ده‌ستبه‌جێی سه‌رجه‌م ده‌ستگیركراوانی خۆپیشاندانه‌كان و قه‌ده‌غه‌كردنی ده‌ستگیركردنی به‌شداربوان و رێكخه‌رانی خۆپیشانده‌ران.
6- دادگایی كردنی هه‌مو ئه‌وانه‌ی كه ده‌ستیان هه‌بوه له شه‌هیدكردن و برینداركردنی خۆپیشانده‌ران و خستنه‌ڕوی ئه‌نجامی لێكۆلێنه‌وه‌كانی دادگاو بڵاوكردنه‌وه‌ی له راگه‌یاندنه‌كاندا.
7- گێڕانه‌وه‌ی هه‌مو ئه‌و هێزه چه‌كدارانه‌ی كه بۆمه‌به‌ستی گوشار خستنه‌سه‌ر خۆپیشانده‌ران یاخود ترساندنیان به ئاڕاسته‌ی شاره‌كان جوڵێندراون.
8- ده‌ست به‌جێ بانگهێشت كردنی وه‌زیرانی ناوخۆ و پێشمه‌رگه و سه‌رۆكی حكومه‌تی هه‌رێمی كوردستان، وه لیپێچینه‌وه له گه‌ڵیان له باره‌ی پێشێلكردنی ماده‌ی یه‌ك له یاسای سه‌رۆكایه‌تی هه‌رێمی كوردستان به‌وه‌ی هێزی پێشمه‌رگه‌یان به‌ره‌و شاره‌كان جوڵاندوه له كاتێكدا ئه‌مه ته‌نها له ده‌سه‌ڵاتی سه‌رۆكی هه‌رێمی كوردستانه.
9- لابردنی باره‌گای حیزبه‌كان له ناوه‌ندی شارو شارۆچكه‌كاندا گواسته‌نه‌وه‌یان بۆ ده‌ره‌وه‌ی شارو شارۆچكه‌كان.
11- دڵنیایی كردنی هاونیشتیمانیان له‌وه‌ی كه چیدی وه هه‌میشه هیچ هێزێكی نیشتیمانی و حكومی كوردی سوپا و هێزی چه‌كدار نابه‌نه سه‌ر هیچ شارو شارۆچكه‌یه‌كی كوردستان و سه‌ر هیچ هێزێكی ركابه‌رو نه‌یاری هێزه فه‌رمانڕه‌واكانی كوردستان.
12- به‌ڕه‌سمی پۆزش هێنانه‌وه بۆ جه‌ماوه‌ری خۆپیشانده‌ر له لایه‌ن هه‌مو ئه‌و كه‌س و لایه‌ن و راگه‌یاندنانه‌ی كه خۆپیشاندانی خه‌ڵكیان به "ئاژاوه گێڕ" ناو بردوه، به ئۆپۆزسۆن و ده‌سه‌ڵاته‌وه، وه به ره‌سمی داوای لێبوردن له جه‌ماوه‌ر بكه‌ن.
چواره‌م: داواكاری خۆپیشانده‌ران كه په‌یوه‌سته به حكومه‌ت: په‌رله‌مان له ئێستاوه به دواداچونی حكومه‌ت ده‌ست پێ بكات بۆ جێبه‌جێكردنی داواكاریه هه‌نوكه‌یه‌كانی خۆپێشانده‌ران.
پێنجه‌م: دانانی نه‌خشه رێگایه‌ك له‌لایه‌ن په‌رله‌مانه‌وه بۆ جێبه‌جێكردنی ئه‌و داواكاریه بنه‌ڕه‌تیانه‌ی خۆپیشانده‌ران كه له گه‌ڵ یاسا و دیموكراتیه‌ت و كاری دامه‌زراوه‌ییدا گونجاون.
شه‌شه‌م: سه‌رۆكایه‌تی په‌رله‌مان داوا بكات له ئه‌نجومه‌نی دادوه‌ری هه‌ڵسه‌نگاندن بۆ دادگاكانی هه‌رێم بكات و پێداویستی شاره‌كان بۆ داده‌وه‌ر پڕبكاته‌وه، به مه‌به‌ستی لێكۆڵینه‌وه‌و یه‌كلایكردنه‌وه‌ی كێشه‌كانی (17/2/2011) و رۆژانی دواتر.
حه‌وته‌م: لیژنه‌ی لێكۆڵینه‌وه‌ی باڵا كه به پێی بڕیاری ژماره (1)ی په‌رله‌مان و حكومه‌ت پێكهێنراوه ئه‌نجامه‌كان له گه‌ڵ ته‌واو بونیاندا بڵاوبكاته‌وه بۆ رای گشتی.
هه‌شته‌م: ئه‌و پرۆژه یاسایانه‌ی كه خواستی خۆپیشانده‌رانن به تایبه‌ت: پرۆژه یاسای ده‌سته‌ی نه‌زاهه، ئه‌نجومه‌نی راژه، بیمه‌ی ته‌ندروستی، مافی به‌ده‌ستهێنانی زانیاری، گرنگی دان به گه‌نجان، بودجه‌ی پارته سیاسیه‌كان، به‌ره‌نگاربونه‌وه‌ی توندوتیژی خێزان، رێكخراوه نا حكومیه‌كان، خاوه‌ن پێداویستیه تایبه‌ته‌كان، داواكاری گشتی، قه‌ده‌غه‌كردنی رێكخستنی حیزبی له ناو هێزی پێشمه‌رگه و ناوخۆ....تد، بخرێته ئه‌و له‌ویه‌تی كارنامه‌ی ئه‌م خوله‌ی په‌رله‌مانه‌وه.
نۆیه‌م: له سه‌ر ئه‌نجومه‌نی وه‌زیران و لایه‌نه په‌یوه‌ندیداره‌كانه، ئه‌م بڕیاره جێبه‌جێبكه‌ن.
ده‌یه‌م: ئه‌م بڕیاره جێبه‌جێ ده‌كرێت له رۆژی په‌سه‌ندكردنیه‌وه (17/3/2011) و له رۆژنامه‌ی فه‌رمی وه‌قایعی كوردستان بڵاوده‌كرێته‌وه.
15/03/2013
زیاتر...
رونكردنه‌وه‌یه‌ك له فراكسیۆنه‌كانی ئۆپۆزسیۆنه‌وه له په‌رله‌مانی كوردستان، سه‌باره‌ت به پرسی ره‌شنوسی ده‌ستور...
فراكسیۆنه‌كانی ئۆپۆزسیۆن: نه‌گه‌ڕاندنه‌وه‌ی ره‌شنوسی ده‌ستور پێچه‌وانه‌ی بڕیاری په‌رله‌مانه...
ئۆپۆزسیۆن داوا ده‌كات رێكه‌وتننامه‌كه‌ی هه‌رێم و به‌غدا ببرێته په‌رله‌مان...
ئۆپۆزسیۆن: درێژکردنەوەی ماوەی سەرۆکایەتی و خۆ هەڵبژاردنەوەی مەسعود بارزانی رەتدەکاتەوە...
ئه‌مرۆ هه‌رسێ لایه‌نی ئۆپۆزسیۆن كۆده‌بێته‌وه...
سه‌رۆكایه‌تی هه‌رێم سێ داواكاری ئۆپۆزسیۆن ده‌چه‌سپێنێت...
پێشنیاری فراكسیۆنه‌كانی ئۆپۆزسیۆن بۆ چاكسازی له بودجه‌دا ...
به‌لاغی كۆتایی كۆبونه‌وه‌ی هاوبه‌شی هه‌رسێ لایه‌نی ئۆپۆزسیۆن...
له‌یادی 16/3دا، هه‌رسێ لایه‌نی ئۆپۆزسیۆن یاداشتێك بۆ سه‌رۆكایه‌تی په‌رله‌مانی كوردستان ده‌خه‌نه‌ڕو...
به‌یاننامه‌ی هاوبه‌شی هه‌رسێ لایه‌نی ئۆپۆزسیۆن سه‌باره‌ت به‌ساڵیادی خۆپیشاندان‌و روداوه‌كانی 17/شوبات...
پاکێجەکانی ئۆپۆزیسیۆن ...
1
پهڕهی
له 1
ژماره‌ی بابه‌ت
شەش لایەن پشتگیریی بڕیارەکانی پەرلەمانی عێراق دەکەن
د. یوسف: بەبەڵگە سەلمێندرا ساختەكاری گەورە کراوە و ئەنجامى هەڵبژاردن شێوێندراوە
