به‌یاننامه‌ی هاوبه‌شی هه‌رسێ لایه‌نی ئۆپۆزسیۆن سه‌باره‌ت به‌ساڵیادی خۆپیشاندان‌و روداوه‌كانی 17/شوبات
به‌یاننامه‌ی هاوبه‌شی هه‌رسێ لایه‌نی ئۆپۆزسیۆن
سه‌باره‌ت به‌ساڵیادی خۆپیشاندان‌و روداوه‌كانی 17/شوبات
به‌ناوی خوای به‌خشنده‌ی میهره‌بان
جه‌ماوه‌ری به‌شه‌ره‌فی هه‌رێمی كوردستان
لایه‌نه سیاسیه تێكۆشه‌ره‌كان
كه‌سوكاری شه‌هیدان وبریندارانی 17/شوبات
ئه‌ندامان و دۆستان
وا ساڵێك به‌سه‌ر ڕووداوه‌كانی 17/ی شوبات و ڕۆژانی دواییدا تێده‌په‌ڕێ له‌كاتێكدا به‌شێكی زۆر له جه‌ماوه‌ری خه‌ڵكی كوردستان به‌شێوازێكی مه‌ده‌نیانه و دوور له توندوتیژی ویستیان ته‌عبیر له هه‌ندێ له خواسته یاسایی وده‌ستوریه‌كانی خۆیان بكه‌ن و داوای ئه‌نجامدانی چاكسازی وده‌سته‌به‌ركردنی عه‌داله‌تیان ده‌كرد له‌دابه‌شكردنی داهاته‌كانی كوردستاندا وه‌ك موماره‌سه‌كردنی به‌شێك له‌مافه ڕه‌واكانی خۆیان، به‌لاَم مه‌خابن له‌جیاتی ئه‌وه‌ی هه‌ردوو حیزبی حوكمڕان بیكه‌نه خاڵی وه‌رچه‌رخان و به‌خۆدا چونه‌وه‌و وه‌ستان له‌ئاستی به‌رپرسیاریه‌تیه‌كانی خۆیاندا له به‌رده‌م خواسته‌كانی گه‌له‌كه‌ماندا نه‌یانتوانی تاسه‌ر دان به‌خۆدا بگرن‌و په‌نا بۆ توندوتیژی نه‌به‌ن، ئه‌وه‌بوو كۆمه‌ڵێك له ڕۆڵه به‌ئه‌مه‌ك و دڵسۆزه‌كانی ئه‌م گه‌له سته‌مدیده خه‌ڵتانی خوێن كران‌و ژماره‌یه‌كیشیان بریندار بوون، كه‌وتنه سوتاندن‌و تاڵانكردنی بنكه‌و باره‌گاكانی گۆڕان له سنوری پارێزگای هه‌ولێرو هه‌ڵكوتانه سه‌ر بنكه‌و باره‌گاكانی كۆمه‌ڵ‌و یه‌كگرتوو له هه‌ولێرو سلێمانی.
دواتر به ئومێدی ئارامكردنه‌وه‌ی دۆخه‌كه هاوڵاتیانی ناڕازی به‌سه‌رجه‌م چین‌و توێژه‌كانه‌وه چه‌ند مه‌یدانێكی ئازادیان سازكردو زیاتر له دوو مانگ به‌جوانترین شێوازی ئاشتیانه‌و به‌رزكردنه‌وه‌ی هاواری (به‌ئاشتی..به‌ئاشتی) به‌رده‌وامی خۆیان له‌سه‌رخواسته ڕه‌واكانیان چه‌سپاند،به‌ڵام ده‌سه‌ڵات له رێگه‌ی كۆكردنه‌وه‌ی هێزو گه‌مارۆدان‌و كۆنترۆڵ كردنی چه‌كدارانه‌ی شاره‌كان و سوتاندنی مه‌یدانه‌كانی ئازادی خۆپیشاندانه‌كانیان سه‌ركوتكرد، له‌به‌رامبه‌ردا وه‌ك هه‌ست كردن به به‌رپرسیاریه‌تی‌‌و بۆ پاراستنی ئه‌زموون و ئارامی هه‌رێمی كوردستان جه‌ماوه‌ری شه‌قام و ئه‌نجومه‌نه‌كانی ئازادی‌‌و لایه‌نه‌كانی ئۆپۆزسیۆن به‌گیانێكی به‌رپرسیاریه‌تی وئیستعابی فراوانه‌وه ئیحتیوای ئه‌وهێرشه چه‌كدارانه‌یان كرد و هه‌رێمه‌كه‌یان له‌ئه‌گه‌ری شه‌رێكی خوێناوی پاراست و له‌ده‌ست پێشخه‌ریه‌كدا هێزه ئۆپۆزسیۆنه‌كان خواسته‌كانی ئه‌و جه‌ماوه‌ره توڕه‌و بێزاره‌یان فۆڕمه‌له كرد له پڕۆژه‌یه‌كی 22خاڵی بۆ چاكسازی و دواتر كردیانه پڕۆژه‌یه‌كی شه‌ش پاكێچی بۆ ئه‌وه‌ی هاوكاری دڵسۆزانه‌ی ده‌سه‌لاَت بكه‌ن و هانی بده‌ن تا به ئه‌ركی خۆی هه‌ستێ و ده‌ست بداته چاكسازیه‌كی جدی و ریشه‌یی.
هه‌روه‌ك له‌و سه‌روبه‌نده‌شدا پارله‌مان و سه‌رۆكایه‌تی هه‌رێم چه‌ندین بڕیاریان ده‌ركرد سه‌باره‌ت به‌ده‌ره‌نجامه‌كانی ئه‌وروداوانه‌و خواسته‌كانی خه‌ڵك، به‌لاَم مه‌خابن ده‌سه‌ڵات خۆی خڵافاند و پشتی كرده خواسته‌كانی شه‌قام و ئۆپۆزسیۆن، نه‌ك هه‌ر داواكراوانی دادگاكانی سه‌باره‌ت به شه‌هیدو برینداره‌كان راده‌ست نه‌كرد، به‌ڵكو كه‌وتنه ڕاوه‌دونانی چالاكوان و ئازادی خوازان و گۆڕانخوازان و ئازاردان و گرتن و سزادانی میدیاكاران و ڕۆشنبیران، دواتریش به ڕوداوه‌كانی بادینان و زینووكردنه‌وه‌ی كلتوری باره‌گا سوتاندن وه‌لاَمی خواستی ڕه‌وای جه‌ماوه‌ریان دایه‌وه.
ئێستاش كه‌ساڵێك به‌سه‌ر ئه‌و ڕوداوه مێژوییه‌دا تێده‌په‌ڕێت ئێمه له‌هه‌رسێ لایه‌نی ئۆپۆزسیۆن به‌ڕێزو حورمه‌ته‌وه له‌به‌رده‌م خوێنی شه‌هیداندا ده‌وه‌ستین و ڕوده‌كه‌ینه كه‌س و كاری سه‌ربه‌رزیان‌و پێیان ده‌ڵین خوێنی ڕۆڵه‌كانتان به‌فیڕۆ ناچێت‌و له‌كاروانی هه‌موو ئه‌و ئازادیخواز و چاكسازیخوازانه‌دان كه به‌درێژایی مێژوو له‌پێناو داواكاری چاكسازی‌‌و عه‌داله‌ت‌و دژایه‌تی گه‌نده‌ڵیدا به‌جۆره‌ها شێوه قوربانیان له‌پێناو مرۆڤایه‌تیدا داوه.
هه‌ربه‌م بۆنه‌شه‌وه ئێمه هه‌رسێ لایه‌نی ئۆپۆزسیۆن په‌یمان بۆ شه‌هیدان و قوربانیده‌ران و ته‌واوی خه‌ڵكی كوردوستان نوێ ده‌كه‌ینه‌وه كه له‌پێناو چاكسازی و گۆڕانخوازی‌‌و به‌ره‌و به‌ده‌ست هێنانی ته‌واوی مافه ڕه‌واكانی گه‌له‌كه‌مان هه‌رده‌م كۆڵ نه‌ده‌ین و به‌رده‌وام ده‌بین له‌سه‌ر داكۆكی كردن له‌خواسته ڕه‌واكانی گه‌له‌كه‌مان به هه‌موو رێ وشوێن و میكانیزمه مه‌ده‌نی ودیموكراسیه‌كان‌و جه‌خت ده‌كه‌ینه‌وه له‌سه‌ر داخوازیه ڕه‌واكانی هاوڵاتیان‌و پرۆژه چاكسازیه‌كانی هه‌رسێ لایه‌نی ئۆپۆزسیۆن.
هه‌روه‌ك له‌م بۆنه‌یه‌دا به‌خه‌ڵكی كوردستان‌و به ئه‌ندام و جه‌ماوه‌ری هێزه‌كانی ئۆپۆزسیۆن راده‌گه‌یه‌نین كه ئێمه هه‌رده‌م له‌سه‌نگه‌ری پشتیوانی‌‌و داكۆكیكاری به‌رده‌وامی خواسته‌ڕه‌واكانی گه‌له‌كه‌مانین و خۆپێشاندان و ده‌ربڕینی ناره‌زایه‌تی و ده‌نگهه‌ڵبرین له‌به‌رانبه‌ر ناعه‌داله‌تی و دژایه‌تی هه‌موجۆره‌كانی گه‌نده‌ڵیدا به‌مافی ڕه‌واو شارستانی خه‌ڵك ده‌زانین، به‌لاَم له‌به‌ر بارودۆخی هه‌ستیاری هه‌رێم و عێراق و ناوچه‌كه ئێمه له ئێستادا به‌رنامه‌ی خۆپیشاندان و گردبونه‌وه‌ی جه‌ماوه‌ری و چالاكی سه‌رشه‌قاممان نیه‌‌و، گرنگ لای ئێمه پاراستنی گیانی زیندویه‌تی ئه‌م یاده‌یه، هه‌روه‌ك به‌توندی هه‌رجۆره چاره‌سه‌رێكی ئه‌منی و سه‌ربازی ره‌تده‌كه‌ینه‌وه له ئه‌گه‌ری هه‌ر چالاكیه‌كی جه‌ماوه‌ری‌‌و خۆپیشاندان و ناڕه‌زای ده‌ربڕینێكی ئاشتیانه‌و مه‌ده‌نیانه‌دا.
بزوتنه‌وه‌ی گۆڕان یه‌كگرتوووی ئیسلامی كوردستان كۆمه‌ڵی ئیسلامی كوردستان
16/شوباتی 2012